Mishi sipas ASK mungon në shumicën e sofrave të kosovarëve.

Nga rezultatet e Anketës mbi të Ardhurat dhe Kushtet e Jetesës 2018, e të publikuara në gusht të vitit 2020, del se vetëm 38.7 për qind e ekonomive familjare në vendin tonë mund ta përballojnë shujtën me mish, pulë ose peshk cdo të dytën ditë.

“38.7% e ekonomive familjare mund të përballojnë shujtën me mish, pule dhe peshk çdo të dytën ditë, ndërsa 61.3% e ekonomive familjare nuk mund të përballojnë këtë shpenzim”, thuhet në këtë raport të Agjencisë së Statistikave, shkruan reporteri.

Anketa e të Ardhurave dhe Kushteve të Jetesës(AAKJ) u realizua për herë të parë në vendin tonë në vitin 2018.

Anketa e të Ardhurave dhe Kushteve të Jetesës (AAKJ) është në përputhje të plotë me metodologjinë e Eurostat dhe metodologjinë që përdorin të gjitha vendet e tjera anëtare të Bashkimit Evropian.

Kjo anketë është një instrument për mbledhjen e mikro të dhënave në kohë dhe të krahasueshme mbi të ardhurat, varfërinë, përjashtimin social dhe kushtet e jetesës.

Deri në vitin 2017 sigurimi i informacionit për treguesit kryesorë të nivelit të jetesës, mirëqenies, varfërisë dhe treguesve të tjerë është siguruar nëpërmjet Anketës së Buxhetit të Ekonomive Familjare (ABEF) e zhvilluar që nga viti 2002 deri në vitin 2017.