Kryeministri i vendit Avdullah Hoti, ka pritur sot në takim kryetarin e SBASHK-ut, atë të Sindikatës së Mjekësve, të Policisë si dhe të Doganës.
Gjatë konferencës Hoti tha se Ligji për Paga i prek mbi 70 mijë të punësuar në sektorin publik. Të tillët sipas kryeministrit kanë shqetësime për sa i përket aktgjykimit të fundit të Gjykatës Kushtetuese, raporton Front Online.
“Sot kishim një takim me kryetarët e sindikatave, që përfaqësojnë rreth 70 mijë të punësuar në sektorin publik. Shqetësimi që ata e kanë lidhur me aktgjykimin e fundit të Gjykatës Kushtetuese lidhur me Ligjin për Paga në Sektorin Publik, e që e kemi edhe ne. Më lejoni që të them nga pozicioni që kam, mendoj që vendimet e gjykatave të cilit do nivel nuk diskutohen fare por pranohen ashtu siç janë”, ka thënë ai.
Hoti theksoi që së bashku morën vendim që të formojnë një Grup Punues, i cili sipas kryeministrit do ta konsultojë këtë Ligj, raporton tutje Front Online.
Në takimin që ne patëm u dakorduam që Qeveria menjëherë të formojë Grupin Punues, për të proceduar në Kuvend, Ligjin për Paga, duke marr parasysh argumentet që i ka shfrytëzuar Kushtetuesja për këtë ligj por duke diskutuar edhe me grupet e tjera që mund të kenë vërejtje për këtë Ligj”, ka thënë tutje ai.
Sipas Hotit, në këtë Grup Punues do të jenë të përfshira të gjitha sindikatat që janë duke e kundërshtuar aktgjykimin e Kushtetueses, për Ligjin për Paga.
“Në këtë Grup Punues do të jenë të përfshira të gjitha këto sindikata, sepse të gjitha ata punëtorë janë të përfaqësuar nga kryetarët e këtyre sindikatave që janë këtu bashkë me mua. Zotimi i Qeverisë është që ne do të nisim menjëherë brenda procedurave sa më të shkurta të mundura ligjore për ta proceduar ligjin në Qeveri. Normalisht që do t`i konsultojmë edhe të tjerët”, ka thënë tutje ai.
Në ndërkohë dje Gjykata Kushtetuese e ka shpallur të pavlefshëm Ligjin për Paga në Sektorin Publik. Sipas Kushtetues disa nene të këtij ligji nuk janë në përputhje me Kushtetuesen. Kujtojmë që pas ankesave të disa sindikatave, Avokati i Popullit ka dorëzuar kërkesë në Kushtetuese për të parë nëse disa nene të këtij ligji janë në përputhje me Kushtetutën. /Front Online
