Dikush me duartrokitje e brohoritje.

Disa me lëvdata ne rrjetet sociale.  Të tjerë  përmes këngës.

Të gjithë, pa përjashtim, në njërën apo tjetrën formë, falënderuan mjekët dhe infermierët për punën që po bëjnë këto ditë në luftën kundër Coronavirusit.

Këtij karvani të falënderimeve iu bashkëngjiten edhe krerët institucional.

Mirënjohjen e tyre, pos me llafe siç bëjnë gjithmonë, këta e shprehen duke dhuruar për këtë kategori edhe 300 euro shtesë për muajin prill e maj.

Por sa në të vërtetë janë pagat aktuale të mjekëve dhe infermierëve?

Paga e një mjeku specialist është 661 euro.

Ajo e një mjeku specialist te mjekësisë familjare është 615 euro, derisa ajo mjekut që është ne specializim dhe një mjeku te përgjithshëm është 566 euro.

Me 472 euro paguhet kryeinfermieri.

Derisa me nga 425 euro dhe 377 euro paguhen dy vartësit e tij, respektivisht infermieri 1 dhe infermieri 2.

Pagat e mjekëve janë dyfish më të vogla se ato të të gjithë liderëve institucional, kurse ato të infermierëve madje edhe trefish më të ulëta.

E po kaq të vogla sesa pagat e deputetëve, paga e të cilëve shkon në mbi 1500 euro.

Ligji për paga, që u pezullua nga Kushtetuesja deri në qershor, ua përmirëson pagesën mujore mjekëve.

Megjithatë prapë, ai,  i lë shumë prapa pagave të liderëve, ministrave dhe zyrtarëve të tjerë shtetërorë.

Derisa paga me e larte ne sektorin e shëndetësisë, me hyrjen ne fuqi te Ligjit për Paga, do te jete 1195.

Kjo shifër është prapë më  e ulët sesa shifra qe marrin zyrtaret shtetëror.

Zëvendëskryeministri do ta ketë pagën 1 mijë 912 euro. Ndërkaq, ministrat 1 mijë 792 euro.

Hiq më keq nuk do të kenë pagat as deputetët, të cilët do të paguhen 1 mijë e 792 euro./Front Online/