Zëdhënësi i Partisë Demokratike të Kosovës (PDK), Faton Abdullahu, ka publikuar një shkrim ku ka reflektuar mbi zhvillimet e fundit në parti, periudhën e vështirë të PDK-së dhe pritjet për rikthimin e drejtuesve të saj që po përballen me procesin gjyqësor në Hagë.

Abdullahu ka thënë se, pavarësisht kritikave dhe vështirësive të viteve të fundit, PDK-ja ka arritur të ruajë unitetin dhe strukturën e saj.

“Përkundër të gjithave, sot PDK-ja është unike”, ka shkruar Abdullahu, duke shtuar se ideja për rikthimin e drejtuesve të saj nga Haga ka shërbyer si motivim për anëtarët dhe aktivistët e partisë.

Sipas tij, përçarja e PDK-së do të kishte pasoja të rënda morale dhe politike për ata që ndodhen në Hagë, ndërsa ka vlerësuar qëndrueshmërinë e anëtarëve të partisë gjatë kësaj periudhe.

Abdullahu ka veçuar edhe tre figura të PDK-së: Enver Hoxhajn, Memli Krasniqin dhe Bedri Hamzën, duke i cilësuar si meritorë për ruajtjen e stabilitetit të partisë në periudha të ndryshme.

Për Enver Hoxhajn, ai ka vlerësuar përvojën dhe aftësinë për të parashikuar zhvillimet politike rajonale dhe gjeopolitike. Ndërsa për Memli Krasniqin ka theksuar aftësinë për reagim dhe konsolidimin e strukturave rreth projekteve politike.

Sa i përket kryetarit aktual të PDK-së, Bedri Hamzës, Abdullahu ka vlerësuar korrektësinë, përvojën dhe qasjen e tij në analizimin e rrethanave politike.

Në fund të shkrimit, zëdhënësi i PDK-së ka shprehur bindjen se partia është e gatshme për një fazë të re politike, të cilën e lidh drejtpërdrejt me kthimin e drejtuesve të saj nga Haga.

“Përkundër të gjithave, sot jemi të gatshëm për një epokë të re që do të lindë bashkë me kthimin e tyre”, ka shkruar Abdullahu, duke e lidhur këtë me synimin për zhvillim, shpresë dhe unitet më të madh në Kosovë.

Postimi i plotë: