Kryeministri i Kosovës, Albin Kurti ka prezantuar disa premtime të mëdha për qytetarët e Kosovës, nga rritja e subvencioneve për punësimin e të rinjve, kontributet për punëtorët e shtetit me përvojë, shtesat për fëmijët, deri te paga e 13-të dhe synimi për një pagë mesatare prej 1,000 eurosh për sektorin publik.

Këto premtime nga ekonomistët po shihen si afatshkurtër dhe rritje jo reale për një ekonomi të fortë.

Derisa, nga sindikata e sektorit privat ky premtim shihet me rezervë dhe mund të përmbushët nëse ka sërish zgjedhje të reja.

Azemi: Kurti e rriti pagën minimale kur iu deshën votat

Kryetari i Sindikatës së Sektorit Privat, Jusuf Azemi në një prononcim për “Front Online” ka shprehur skepticizëm lidhur me premtimin e Kryeministrit Albin Kurti për të arritur një pagë mesatare prej 1,000 eurosh, që përfshin vetëm sektorin publik.

“Realisht është shumë mirë është çdo gjë që ngritët, është i mirëseardhur, por kjo realizohet nëse shkojmë në zgjedhje të reja për shkak të Presidentit”, tha Azemi.

Azemi ka akuzuar Kurtin që ka rritur pagën minimale për t’i fituar votat.

Jusuf Azemi: Të hënën do ta bëjmë kërkesën që paga minimale të jetë 600 euro

Kryetari i Sindikatës së Sektorit Privat, Jusuf Azemi në një prononcim për “Front Online” ka paralajmëruar se nga e hëna do të dorëzojë kërkesë që paga minimale të jetë 600 euro për të gjitha kompanitë që ofrojnë shërbime për institucionet shtetërore.

“Për ndryshe siç ka reflektuar për pagën minimale që e rriti pagën kur iu deshën votat dhe ne nga e hëna do kemi një kërkesë që paga minimale duhet të jetë 600 euro për gjithë ato kompani që kryejnë shërbime për institucione shtetërore”, thotë Azemi për “Front Online”.

Paralajmërimi i ekonomisti: Paga e 13-të dhe subvencionet e të rinjve ndikim afatshkurtër, jo transformues

Njohësi i ekonomisë, Lulzim Beqiri  ka folur për “Front Online” lidhur me premtimet e qeverisë për rritjen e pagës minimale, pagën e 13-të, shtesat për fëmijë dhe subvencionet për punësimin e të rinjve, duke vënë theksin te rëndësia e qëndrueshmërisë fiskale dhe ndikimit real në ekonomi.

Hetemi ka thënë se rritja e subvencionit për punësimin e të rinjve mund të ndihmojë në uljen e papunësisë nëse krijohen vende pune të qëndrueshme.

“Këto premtime do t’i shihja me kujdes në aspektin e qëndrueshmërisë fiskale dhe ndikimit real në ekonomi. Rritja e subvencionit për punësimin e të rinjve mund të ketë efekt pozitiv në uljen e papunësisë dhe në frenimin e emigrimit, por vetëm nëse monitorohet mirë dhe krijon vende pune të qëndrueshme, jo formale apo afatshkurtra”, tha ai.

Ai ka vënë në pah se paga e 13-të dhe objektivi për një pagë mesatare prej 1000 eurosh janë më sfiduese.

Sipas tij, pa këto masa ekziston rreziku i inflacionit dhe i zgjerimit të deficitit buxhetor.

“Paga e 13-të dhe objektivi për pagë mesatare 1000 euro janë më sfiduese, sepse rritja e pagave është e qëndrueshme vetëm nëse mbështetet nga rritje reale e produktivitetit, investimeve dhe zhvillimit të sektorit privat; përndryshe ekziston rreziku i inflacionit dhe i rritjes së deficitit. Këto masa mund të përmirësojnë mirëqenien në afat të shkurtër. Realizimi i plotë dhe efekti afatgjatë varen nga rritja ekonomike, menaxhimi i kujdesshëm i buxhetit dhe reforma strukturore në ekonomi”, deklaroi Beqiri për “Front Online”.

Muhaxheri: Masat sociale mund të ndihmojnë familjet, por rritja reale kërkon ekonomi të fortë

Ekonomisti Arton Muhaxheri në një prononcim për “Front Online” foli për premtimet e kryeministrit Albin Kurti lidhur me ekonomi.

Muhaxheri thot se këto masa mund të kenë ndikim pozitiv në afat të shkurtër, por kërkojnë bazë të fortë ekonomike për të qenë të qëndrueshme.

“Janë masa që në parim kanë efekt pozitiv afatshkurtër në mirëqenie. Ato mund të rrisin konsumin, të lehtësojnë barrën për familjet dhe të stimulojnë punësimin, sidomos nëse zbatohen me kritere të qarta dhe kontroll efektiv”, u shpreh Muhaxheri.

Ai ka paralajmëruar se sfida kryesore mbetet qëndrueshmëria fiskale dhe efekti real afatgjatë i këtyre politikave.

“Sfida kryesore mbetet qëndrueshmëria fiskale dhe efekti real afatgjatë. Nëse këto masa nuk mbështeten nga rritje e produktivitetit, investime dhe zgjerim i bazës tatimore, ato mund të krijojnë presion mbi buxhetin ose të kenë efekt të kufizuar strukturor”, ka deklaruar ai.

Ai ka nënvizuar se politikat sociale janë të mirëseardhura, por duhet të shoqërohen me reforma strukturore që garantojnë rritje të qëndrueshme ekonomike.

“Paga mesatare 1000 euro dhe paga e 13-të nuk arrihen vetëm me vendim politik, por me zhvillim ekonomik real. Rreziku është që përfitimi të jetë i përkohshëm dhe më shumë social sesa transformues për ekonominë”, ka thënë Muhaxheri për “Front Online”.