Tri autosallone, “Alberti”, “Sherreti” dhe “AutoMita” kanë deklaruar qarkullim prej hiç më pak se 103 milionë euro nga shitja e automjeteve gjatë vitit 2024, përderisa fitimi neto i deklaruar nga këto tri kompani ka qenë 10.5 milionë euro, raporton portali “FrontOnline”.
Autosalloni “Alberti” prin me shitje të veturave, pronari akuzohet si i dyshuar për fajde
Sipas pasqyrave individuale të të ardhurave të dorëzuara nga këto kompani në Ministrinë e Financave për vitin 2024, autosalloni “Alberti” ka pasur qarkullimin më të madh, përkatësisht 35.5 milionë euro, apo 2.5 milionë euro më shumë se në vitin 2023. Nga ky qarkullim ky biznes që udhëhiqet nga Skender Bajrami ka deklaruar fitim neto për vitin 2024 në vlerë prej 6.36 milionë euro, raporton FrontOnline.
Afërisht sa autosalloni “Alberti” ka shitur vetura gjatë vitit 2024 edhe autosalloni “Sherreti”, përkatësisht 35.3 milionë euro, mirëpo fitimi neto i deklaruar nga kjo e fundit ka qenë 2.65 milionë euro.
Ndërsa “Automita”, e cila është përfaqësues zyrtar për Kosovë dhe Shqipëri i veturave Renault, Nissan, Dacia dhe Volvo, gjatë vitit 2024 ka pasur qarkullim prej 31.5 milionë euro, ndërsa fitimi neto i deklaruar ka qenë 1.53 milionë euro.
Përndryshe, drejtori i Përgjithshëm i Policisë së Kosovës, Gazmend Hoxha, ka folur dje për përhapjen e fenomenit të fajdes në vend.
Sipas Hoxhës, njëra nga format e fajdes, është edhe ajo e pronarëve të salloneve të veturave.
“Fenomeni është prezent dhe kemi krijuar një task-forcë. Janë dy ose tri forma si po kryhen fajdet në Kosovë. E para është kur fajdexhiu, së bashku me viktimën, shkojnë te noteri dhe noterizojnë marrëveshjet për fajde. E dyta lidhet me sallonet e veturave dhe shitblerjen e tyre. Sipas informacioneve që kemi, pronarët e salloneve të veturave janë të përfshirë në fajde,” ka deklaruar Hoxha.
Drejtori i Policisë: Pronarët e salloneve të veturave janë të përfshirë në fajde
Vite me parë, saktësisht në vitin 2023, biznesmeni Skender Bajrami, pronar i autosallonit ‘Alberti’, ishte arrestuar si i dyshuar për përfshirjen në veprën penale të fajdes.
Prokuroria Themelore në Ferizaj në atë kohë kishte kërkuar caktimin e masës së paraburgimit për 15 persona të dyshuar, ndër ta edhe Skender Bajrami, i cili sipas prokurorisë ka shitur veturë me fajde dhe të njëjtën më pas e ka blerë me cmim më të lirë, nga i njejti person.
Në dosjen e prokurorisë thuhet se i dyshuari Skender Bajrami se nga fillimi i vitit 2021 e në vazhdim, në autosallonin ‘Alberti’ ka kontraktuar shuma të fajdes, ndaj të dëmtuarit me inicialet Xh.Sh., pronar i një kompanie.
Por, sa është fitimi vjetor i deklaruar nga Autosalloni “Alberti”?
Sipas pasqyrave financiare të Autosallonit “Alberti” për vitin 2024, kjo e fundit kishte deklaruar shitje vjetore në vlerë prej 35.5 milionë euro, përderisa fitimi neto për vitin 2024 kishin qenë hiç më pak se 6.4 milionë euro.
Përndryshe, Autosalloni “Alberti” është aksinonar edhe në Qendrën më të madhe tregtare në vend, “Prishtina Mall”, ku ka 13% të aksioneve në vlerë financiare prej 22.1 milionë euro, raporton Front Online.
Akuzat për fajde të drejtorit të Policisë/ Autosalloni “Alberti” fitoi rreth 6.5 milionë euro në vit
/FrontOnline/
