Deputetja e PDK-së, Ariana Musliu-Shoshi, ka thënë së humbja e dokumenteve personale të diasporës në pika të ndryshme të konsullatave dhe ambasadave në vend, është shkak nga papërgjegjshmëria e ministres së Jashtme, Donika Gërvalla.

Në seancën e sotme të Kuvendit të Kosovës, ajo ka pohuar se pos humbjes së dokumenteve ka edhe vonesa për pranimin e tyre nga diaspora.

“Nga data 2 tetor 2024 kanë humbur 406 pasaporta, 165 letërnjoftime dhe katër vendime për shtetësi të mërgimtarëve tanë në postën diplomatike të Republikës së Kosovës, dhe ky qytetarë të dashur nuk është rasti i parë që bashkatdhetarët tanë përballen me problemin e tillë,  pra me pajisje të dokumenteve personale”.

“Të risjellim në vëmendje vonesat e shumta për shkak të mungesës së materialit, kanë qenë mjaft evidente edhe në fillim të këtij mandati qeveritar të cilat kanë shkaktuar probleme të shumta të mërgimtarëve tanë, anë e mbanë botës”, ka thënë Musliu-Shoshi.

“Duke pamundësuar edhe ardhjen e tyre në vendlindje për disa muaj. Këto vonesa, qytetarë të dashur, kishin vetëm një qëllim, dhe qëllimi i vetëm është aplikimin e kontratave një-burimore nga kjo ministre e papërgjegjshme. Për të qenë më e qartë me ju, kontratat një-burimore janë hajni”.