Pas mbledhjes së Sekretariatit të Etikës të Kuvendit të Shqipërisë, është vendosur që 3 eksponentë të Partisë Demokratike të përjashtohen 60 ditë nga Parlamenti.

Përkatësisht, të përjashtuar janë kreu i grupit të PD, deputeti Gazment Bardhi, Sekretari i Përgjithshëm i kësaj partie, deputeti Flamur Noka dhe deputeti Bledion Nallbati.

Ndërkohë janë përjashtuar me nga 40 ditë 20 deputetët e tjerë. Edi Paloka është i vetmi nga lista e 24 emrave që është “ndëshkuar” me 10 ditë përjashtim.

Kujtojmë se në seancën e ditës së hënë të kësaj jave, opozitarët dogjën karriget jashtë ambienteve të Parlamentit. Ishin Noka dhe Nallbati ata që i spërkatën karriget me benzinë dhe më pas ua vunë flakën.

Noka pati edhe një përplasje me deputetin Petro Koçi, ku tentoi t’ia shkulë mikrofonin. Ndërsa Bardhi tentoi të godasë me sende kryetaren e Kuvendit, Elisa Spiropali.

Pavarësisht masës disiplinore që u mor, pritet që edhe të enjten të ketë tensione. Të paktën kështu kanë deklaruar vazhdimisht demokratët. /KlanTV