Më 1 nëntor 2023 pritet edhe zyrtarisht në Kosovë të nis regjistrimi i popullsisë, në të cilin proces pritet të angazhohen rreth 5 mijë veta.

Ndonëse kanë mbetur më pak se 1 muaj kur pritet të filloj regjistrimi i popullsisë në vend nga Agjencia e Statistikave të Kosovës (ASK), kësaj të fundit ende nuk i janë dorëzuar tabletët që do të përdoren për regjistrimin e popullsisë, ndonëse një furnizim i tillë parashihej të ndodhte ne fund të muajit të kaluar.

Kryeshefi i ASK-së, Ilir Berisha, në një intervistë për “FrontOnline” jep detajet për përgatitjet përfundimtare që janë duke u bërë për regjistrimin e popullsisë në Kosovë.

 “Afati për rekrutimin e regjistruesve dhe mbikëqyrësve është shtyrë pasi që nuk ka pasur aplikime të mjaftueshme. Ky afat është zgjatur deri më 6 tetor 2023 në bashkëpunim me Ministrinë e Financave. Ne planifikojmë t’i angazhojmë 4400 veta për regjistrimin e popullsisë në Kosovë, përpos kësaj kemi edhe rreth 300 anëtarë të Komisioneve Komunale, kemi edhe Komisionin Qendror dhe afërsisht do t’i kemi rreth 5000 veta të angazhuar. Kjo e bënë projektin më të madhin nacional të statistikave jo vetëm në Kosovë, por edhe më gjerë”, shprehet Berisha për Front Online.

 Furnizimi me tabletë, po diskutohet ndërprerja e kontratës me operatorin ekonomik fitues

 Sfidë për Agjencinë e Statistikave të Kosovës mbetet edhe sigurimi i tabletëve që do të përdoren për regjistrimin e popullsisë.

Ani pse është nënshkruar kontrata, kryeshefi Ilir Berisha thotë që nuk i kanë marrë ende të njejtit nga operatori ekonomik.

 “Tabletët nuk i kemi ende nga operatori ekonomik. Ne i kemi të gjitha përgatitjet për të filluar në nëntor të këtij viti. Nëse sigurohen tabletët brenda këtyre ditëve, atëherë konsiderojmë që një numër më i madh i regjistruesve të bëjmë instalimin e atyre programeve me tabletë. Kërkesa jonë ka qenë që të sigurohen 3500 tabletë, afati i fundit për dorëzim ka qenë 27 shtatori 2023”, tha ai.

 Berisha thotë që po diskutohet ndërprerja kontratës me operatorin ekonomik.

“Ndërsa tani jemi në diskutime dhe tani do të shikojmë mundësitë një grup punues, Agjencia Qendrore e Prokurimit dhe organet tjera, kabineti i kryeministrit janë duke biseduar për më tutje, për ndërprerjen e kontratës dhe mundësive të tjera, gjetjes së zgjidhjes për të mbajtur procesin e regjistrimit të popullsisë”, tha ai për Front Online.

Regjistrimi i popullsisë edhe në veri

 Ndryshe nga hera e kaluar, kur në Komunat veriore të Kosovës, regjistrimi i popullsisë u bojkotua në momentin e fundit, kreyshefi Berisha thotë se tani janë më të organizuar.

Drejtuesi i ASK-së, Ilir Berisha në një intervistë për Front Online ka thënë që emrat e anëtarëve të komisioneve janë dërguar me kohë.

“Pas zgjedhjeve që janë emëruar kryetarët e komunave, Komisioni Qendror ka kërkuar propozimet e tyre, disa veçse janë në formime e sipër, apo Komisioni Qendror i ka formuluar të gjitha komisionet komunale edhe në këto katër Komuna, pasi që propozimet i kanë dërguar të gjitha me kohë për anëtarë të komisioneve sipas ligjit për regjistrimin e popullsisë me strukture dhe me numër të propozuar. Në momentin e fundit është bojkotuar, premtimi ka qenë deri në ditën e fundit që po, është bërë trajnimi i regjistruesve, politikisht është vendosë nga qendrat jashtë Kosovës dhe është bojkotuar”, u shpreh ai.

 Por Berisha thotë që nuk është lehtë që procesi të organizohet në këtë situatë në katër komunat veriore.

“Në bazë të aplikimeve deri më tani, ka aplikime edhe të komuniteteve të tjera. Kuptohet që procesi nuk është aq i lehtë të organizohet në këto kushte regjistrimi i popullsisë, mirëpo besojmë dhe shpresojmë që deri në nëntor do të ketë një situatë më të favorshme edhe për organizimin e regjistrimit të popullsisë edhe në katër komunat veriore”, tha ai për Front Online.

 A do të regjistrohet edhe mërgata kosovare? Flet drejtori i ASK-së

Në regjistrimin e popullsisë do të përfshihet edhe diaspora kosovare.

Kryeshefi i Agjencisë së Statistikave të Kosovës, Ilir Berisha për Front Online ka thënë që do të bëhet pyetësor i veçant për mërgatën.

 “Ne kemi një pyetësor të veçant për regjistrimin e diasporës”, deklaroi ai.

Për ta mbuluar të gjithë procesin e regjistrimit të popullsisë së Kosovës, Qeveria ka ndarë rreth 12 milionë euro.

E, Berisha thotë që janë të mjaftueshme, madje beson që do të kursehen para.

“Buxheti është ndarë në 2021, dhe ka vazhduar ky buxhet sepse ka qenë e planifikuar që të fillojë më herët, diku është rreth 12 milionë euro. Ne besojmë dhe shpresojmë që do të kursehet ky buxhet. Po besojmë që buxheti është i mjaftueshëm për realizimin e të gjitha akitiviteteve të regjistrimit të popullsisë”, theksoi ai./Front Online/