Shqetësim e pasiguri kanë krijuar tek kosovarët tri vrasjet që ndodhën vetëm brenda një javë në në Prishtinë, Klinë e Skenderaj.

Kështu po vlerëson njohësi i sigurisë, Nuredin Ibishi, i cili të enjten dha një intervistë për portalin Front Online.

“Ne jemi vend i vogël, dhe realisht cdo rast i rëndë sidomos i vrasjeve prej armëve të zjarrit, si në rastin “Bon Vivant”, tash edhe në Skenderaj, por edhe rastet e mëhershme, ngrijnë shqetësim edhe pasiguri. U bë shkak të asaj se po kemi shumë qytetarë të papërgjegjshëm, të cilët mbajnë me vete armë zjarri, dhe ata nuk hezitojnë fare të hyjnë nëpër lokale”, deklaroi ai për Front Online.

Për t’i parandaluar këto raste, Ibishi thotë se policia e Kosovës duhet të shpeshtojë kontrollet.

“Mendoj që në këtë rast duhet të ngrisim në aspektin e vetëdijësimit qytetarët, por njëkohësisht edhe vetë organet e sigurisë, në këtë rast policia e Kosovës, duhet të ndërmarrë masa të duhura, me qëllim që të shtojë kontrollin edhe të automjeteve edhe të personave, dhe njëkohësisht edhe në pjesë të qytetit ku janë lokalet”, tha ai për Front Online.

Eksperti i sigurisë: Mbajtjen e armëve, qytetarët e konsiderojnë aset

Eksperti i sigurisë, Nuredin Ibishi numrin e madh të armëmbajtjeve pa leje e lidh me mentalitetin e popullit.

Ky vlerëson se në vendin tonë diçka e tillë konsiderohet aset.

“Tek ne ende nuk është heq mentaliteti për shkak se nuk kemi gëzu pushtet përpara, dhe çdo herë mbajtja e armëve ilegale llogaritet sikur një aset për njerëzit që të vetmbrohen, që ndoshta në të kaluarën ka pasur një arsye, mirëpo tani kur ka një mundësi që të ketë posedim armësh në mënyrë legale, të nxjerr leje i cili i plotëson ato kushte, pse jo mos t’i nënshtrohemi edhe trajnimeve, edhe verifikimeve, dhe njëkohësisht edhe mundësisë për armëbajtje, por jo armëbartje, kjo dallon”, deklaron ai për Front Online.

Ibishi gjen “fajtorin” për vrasjet në Kosovë: Gjyqësia nuk po jep dënime të ashpra

Për tri rastet e vrasjeve në Kosovë, eksperti i sigurisë, Nuredin Ibishi ia lë fajin edhe gjyqësisë.

Kjo meqë sipas tij kjo hallk e sistemi të drejtësisë duhet t`i ashpërsojë dënimet.

“Policia dhe prokuroria, dhe gjykatat të cilat nganjëherë të cilat nganjëherë nuk po janë masa adekuate në shqiptimin e dënimeve gjyqësore që po janë më lehtësuese sesa që po është veprimi. Duhet të jemi më strikt në zbatim të ligjit, edhe në gjyqësi, por edhe policia duhet të ndërmarrë masa me qëllim që këtë dukuri të shëmtuar dhe të rëndë për qytetarët të Kosovës, të hiqet nga kjo mundësi e armëmbajtjes, pa nevojë të qytetarëve”, u shpreh Ibishi për Front Online.

Mëngjesi i sotëm e gjeti Kosovën me një tjetër ngjarje tronditëse.

Policia e Kosovës ka njoftuar se në orët e para të mëngjesit të së enjtes, në Skenderaj është vrarë një 39-vjeçar.

Sipas Policisë në këtë rast të plagosur kanë mbetur edhe tre persona të tjerë.

Ndërsa, të dyshuarit për vrasjen janë në arrati.

Vrasja tjetër ka ndodhur më 7 gusht në Klinë. Rasti ka ndodhur po ashtu në një nga lokalet e këtij qyteti.

Ndërkaq, të premten e 4 gushtit mbeti një i vrarë, e 7 persona të lënduar nga arma e zjarrit. Ndërsa 13 persona të tjerë kanë pësuar lëndime trupore nga gërvishtjet e xhamave.