Me pjesëmarrjen e më se 30 studentëve dhe gazetarëve të rinj, gjatë tri ditëve në Prishtinë është mbajtur moduli i parë i Shkollës së Etikës të Gazetarisë, organizuar nga Këshilli i Mediave të Shkruara të Kosovës (KMShK).

Në ditën e parë, Naile Dema-Selmani, anëtare e bordit të Asociacionit të Gazetarëve të Kosovës (AGK) ka folur për gazetarët dhe raportimin etik, Imer Mushkolaj, drejtor ekzekutiv i KMShK është fokusuar në modelin e vetërregullimit të mediave në Kosovë, ndërkaq juristja e të drejtës së mediave, Flutura Kusari, ka folur për fjalën e lirë, shpifjen dhe fyerjen.

Në ditën e dytë rreth mbrojtjes së privatësisë dhe të të dhënave me pjesëmarrësit ka diskutuar Krenare Sogojeva-Dërmaku, Komisionere për Informim dhe Privatësi, Lavdim Hamidi nga Front Online ka folur për raportimin etik dhe privatësinë, kurse Bashkim Reqica nga Komisioni i Pavarur për Media (KPM) ka prezantuar punën e këtij institucioni në monitorimin e mediave audiovizuele.

Në ditën e tretë të Shkollës… është diskutuar për inteligjencën artificale dhe ndikimin në punën e gazetarëve. Liridon Drenica nga Quantix ka prezantuar platformën Shqip.ai. Remzie Shahini-Hoxhaj nga Universiteti i Prishtinës ka ligjëruar për etikën në raportim, privatësinë dhe programet reality show, kurse Festim Rizanaj nga Hibrid.info ka diskutuar me pjesëmarrësit për rëndësinë e verifikimit të fakteve.

Ky modul i Shkollës së Etikës të Gazetarisë është mbështetur nga Misioni i OSBE-së në Kosovë. Moduli i dytë do të mbahet në fund të vitit.