Policia e Dibrës ka nisur procedimin penal ndaj administratorit të një kompanie interneti, pasi një punonjës 31-vjeçar humbi jetën ditën e hënë, pasi ra në kontakt me rrymën elektrike gjatë punës.
Sipas burimeve nga uniformat blu, administratori i kompanisë, shtetasi O.K., 43 vjeç, akuzohet për shkelje të rregullave të sigurisë në punë. Materialet e hetimit janë dërguar në Prokurorinë pranë Gjykatës së Shkallës së Parë të Juridiksionit të Përgjithshëm Dibër, për të vazhduar me procedurat e mëtejshme, raporton Euronews.al.
“Në vijim të informacionit të dhënë paraprakisht ditën e djeshme lidhur me shtetasin A.S., 31 vjeç, i cili humbi jetën pasi dyshohet të ketë rënë aksidentalisht në kontakt me rrymën elektrike gjatë punës për instalimin e një linje interneti, njoftojmë se, pas hetimeve të kryera nga specialistët e Hetimit të Krimeve të Komisariatit të Policisë Dibër, materialet janë referuar në Prokurori, ku nisi procedimi për veprën penale ‘Shkelja e rregullave të mbrojtjes në punë’ ndaj administratorit të kompanisë, shtetasit O.K., 43 vjeç, banues në Peshkopi,” thuhet në njoftimin e policisë
