Shoqërohet në polici një person në Kaçanik , dyshohet për falsifikim të parasë dhe armëmbajtje pa leje

Një person është ndaluar dhe shoqëruar në polici në orët e hershme të mëngjesit të sotëm në Kaçanik, nën dyshimet për veprat penale “Falsifikim i parasë” dhe “Mbajtje në pronësi, posedim apo kontroll të paautorizuar të armëve”.

Ngjarja ka ndodhur më 24 prill 2025, rreth orës 03:50, në rrugën “Idriz Seferi” në Kaçanik, ku njësitet policore kanë ndaluar një veturë të tipit Seat me targa vendore, e cila drejtohej nga i dyshuari B. R., 23 vjeç

Gjatë kontrollit të automjetit, policia ka gjetur dhe sekuestruar 27 kartëmonedha prej 100 dollarësh, të gjitha me numër serik të njëjtë, të dyshuara si të falsifikuara. Pas intervistimit në stacionin policor në Kaçanik dhe konsultimeve me prokurorin kujdestar, është iniciuar rasti “Falsifikim i parasë”.

Në vijim të veprimeve hetimore, është realizuar një bastisje në shtëpinë e të dyshuarit në Han të Elezit, ku janë gjetur dhe sekuestruar municion i ndryshëm, mjete të mprehta, një boks hekuri, një shkop bejzbolli si dhe një shkrepëse në formë arme. Për këtë është iniciuar rasti i dytë “Mbajtje në pronësi, posedim apo kontroll të paautorizuar të armëve”.