Komuna e Pejës në disa raste ka paguar faturat për Operatoret Ekonomik edhe për punët që ata nuk i kanë kryer fare.
Sipas raportit të Zyrës Kombëtare të Auditimit (ZKA) te kontrata për ndërtimin e shkollës së muzikës “Halil Kasapolli” në Pejë – faza e dytë, e nënshkruar me datë 28.06.2018 në vlerë 467,578 euro, punimet nuk ishin realizuar sipas planit dinamik siç parashihet me kontratë.
Sipas planit dinamik punimet është dashur të përfundojnë më 31.12.2019, megjithatë punimet ende nuk kishin përfunduar dhe kontrata ishte ende aktive.
Po ashtu komuna nuk kishte vazhduar sigurimin e ekzekutimit krahas vonesave të shkaktuara në realizimin e punimeve.
“Kjo ka ndodhur për shkak të mungesës së mjeteve shtesë në dispozicion si nevoje e paraqitur për shkak të planifikimit jo të duhur të projektit si edhe fatkeqësitë natyrore ku gjatë procesit të punëve kanë ndodhur vërshime. Kurse shkak i mos vazhdimit të sigurimit të ekzekutimit ishte pakujdesia dhe neglizhenca nga zyrtarët kompetent” thuhet nw raportin e ZKA-sw, raporton “Front Online”
Sipas auditorit në dy raste pagesat ishin realizuar për punët e pa kryera, si në vijim:
Kontrata “Lot 3 Renovimi i shkollës 7 Shtatori në fshatin Vitomericë” e nënshkruar më12.06.2020 në vlerë prej 52,744.90 euro, vlera e pagesave për punë të pa realizuar ishte 1,900€ si më poshtë:
Pozicioni 1-Furnizimi dhe montimi i një derë me dimensione 300x315cm, sipas situacionit të nënshkruar nga organi mbikëqyrës është realizuar pozicioni, ndërsa nga ekzaminimi fizik ky pozicion ishte i pa realizuar (vlera e punëve të parealizuara 500€), Pozicioni 2-Furnizimi dhe montimi i dy (2) dyerve me dimensione 220x315cm, sipas situacionit të nënshkruar nga organi mbikëqyrës është realizuar pozicioni, ndërsa nga ekzaminimi fizik ky pozicion ishte i pa realizuara (vlera e punëve të parealizuara 800€), Pozicioni 3-Furnizimi me material, transporti dhe vendosja e dyerve PVC me ngjyre të bardhë me dimensione 70/210 cm, sipas situacionit të nënshkruar nga organi mbikëqyrës janë realizuar tetë ( njësi nga ky pozicion, ndërsa nga ekzaminimi fizik konstatuam vetëm katër (4) njësi të realizuara, vlera e punëve të parealizuara 600 €, raporton “Front Online”.
Kontrata “Rregullimi – kubëzimi i trotuarit në lagjen e Gjimnazit” e nënshkruar me dt.03.09.2020 në vlerë prej 37,870€, vlera e pagesave për punë të pa realizuar ishte 2,730€ si më poshtë: Pozicioni 3.2-Heqja e gurëve skajor ekzistues të dëmtuar dhe bartja e tyre deri në deponin me të afërt.
Furnizim me material dhe vendosja e gurëve skajor prej betoni të markës C-35/45, për kufizimin e kubëzave në vende të caktuara në projekt me dimensione 15x25x100cm në bazament prej betoni me trashësi prej 15cm gjithnjë sipas rregulloreve EN 1340 për ketë dimension, pozicioni përfshin të gjitha testimet (edhe testimet e ngjeshmërisë); sipas situacionit të nënshkruar nga organi mbikëqyrës janë realizuar 750 njësi nga ky pozicion, ndërsa nga ekzaminimi fizik rezultojnë vetëm 106 njësi të realizuara (vlera e punëve të parealizuara 322€), pozicioni 3.3-Furnizim me material dhe vendosja e gurëve skajor prej betoni të markës C-35/45, për kufizimin e kubëzave në vende të caktuara në projekt me dimensione 10x25x100cm në bazament prej betoni me trashësi prej 15cm gjithnjë sipas rregulloreve EN 1340 për këtë dimension, pozicioni përfshin të gjitha testimet (edhe testimet e ngjeshmërisë); sipas situacionit të nënshkruar nga organi mbikëqyrës janë realizuar 550 njësi nga ky pozicioni, ndërsa nga ekzaminimi fizik rezultojnë 249 njësi të realizuara, vlera e punëve të parealizuara 2,408€, raporton “Front Online”.
“Kryetari duhet të shtojë kontrollet në mbikëqyrjen e realizimit të projekteve në mënyrë që ato të përfundohen sipas planit dinamik dhe të mos hyj në obligime pa mbulesë financiare. Më tutje, duhet të siguroj që për të gjitha kontratat krahas vonesave në realizimin e punimeve të zgjatet edhe siguria e ekzekutimit.
Po ashtu, kryetari duhet të sigurojë përmes menaxherëve të kontratave që në raportin e pranimit të përfshihen vetëm punët e realizuara” , raporton “Front Online”.
