Pacientët në Klinikën e Radiologjisë në Qendrës Klinike Universitare të Kosovës (QKUK) po vazhdojnë të ballafaqohen me listë të gjatë të pritjes.
Drejtoresha e Klinikes së Radiologjisë, Shkendije Nuza, ka dhënë për “Front Online” një pasqyrë të detajuar mbi gjendjen aktuale të pritjes së pacientëve, si dhe sfidat me të cilat përballet klinika.
Sipas Nuzës, lista e pritjes për rezonancë magnetike (MRI) është me termine të caktuara deri më 17 janar 2025 për rastet e zakonshme (të ftohta).
“Lista e pritjes për MRI termine për raste të ftohta është 17. 01.2025( këtu kanë ndikuar edhe festat e fundvitit )”, tha ajo për FrontOnline.
Ndërsa për rastet onkologjike, ajo thotë se ekzaminimet planifikohen sipas kërkesave të Onkologëve.
“Kjo do të thotë se çdo pacient që kërkon një vizitë onkologjike, do të ketë një plan ekzaminimi në përputhje me rekomandimin e mjekut onkolog”, ka theksuar ajo.
Lista e pritjes për rezonancë magnetike për fëmijët ka shkuar deri më 14 janar 2025
Nuza deklaron se për pacientët spitalorë, terminët nuk janë të parapara, pasi këto raste planifikohen direkt nga klinicistët.
Ndërkaq, për fëmijët që kanë nevojë për MRI me anestezion, lista e pritjes është gjithashtu e ngarkuar, me termine të fundit për janar 2025, ku data më e afërt është 14 janari i vitit të ardhshëm.
“Rastet spitalore nuk kanë termine, planifikohen sipas klinicistëve. Lista e pritjes për fëmijë me anestezion është me 14 .01.2025, pasi që dy të marte janë anuluar për shkak të festave fund viti( ekzaminimi i fëmijëve me MRI me anestezion bëhet ditën e martë për fëmijë ambulantor, dhe premte spitalor)”.
Nuza thotë se lista e pritjes për MRI ka 1350 pacientë, derisa kërkesa ditore janë nga 35 e deri në 70 pacientë.
“Kërkesat për ekzaminime të ndryshme janë në rritje të vazhdueshme, përfshirë radiografi, ultrazë, CT, MRI, mamografi, angjiografi dhe biopsi. Për momentin, lista e pritjes për MRI ka 1350 pacientë, dhe kërkesat ditore janë nga 35 deri në 70 pacientë ditorë”, shpjegon Nuza.
Drejtoresha e Radiologjisë: Duhet të shtohet numri i stafit radiologjik
Drejtoresha e Radiologjisë, Shkendije Nuza në një prononcim për “Front Online” ka folur lidhur me sfidat e klinikës që ajo drejton.
Nuza ka theksuar se rritja e kërkesave dhe listës së pritjes ka sjellë nevojën për shtimin e stafit.
Kërkesa tjetër e kësaj klinike sipas Nuzës, është edhe ngritja e shërbimeve të nivelit terciar.
“Kërkesat e shumta për ekzaminime, rritja e numrit të shërbimeve radiologjike, referimet nga të gjitha qytetet edhe pse shumica kanë aparate të CT, dhe dy qytete përveç QKUK kanë edhe MRI. Me rëndësi është edhe shtimi i numrit të stafit radiologjik si teknik ashtu edhe radiolog, dhe qëllimi është ngritja e shërbimeve të nivelit terciar”, theksoi ajo.
Për nëntë muaj mbi 120 mijë pacientë morën shërbime në Radiologji
Për periudhën 9-mujore, Klinika e Radiologjisë ka realizuar një numër të konsiderueshëm shërbimesh për qytetarët, duke siguruar diagnostikimin dhe trajtimin për një numër të madh pacientësh
Gjatë 9 muajve kjo klinikë ka kryer shërbime për 120,684 pacientë, kështu ka bërë të ditur për “Front Online” drejtoresha e Radiologjisë, Shkendije Nuza.
Derisa ajo ka bërë të ditur edhe cilat shërbime janë kontrolluar pacientët.
“Radiografi: 65,302 pacientë
CT (Tomografi Kompjuterizuar): 21,348 pacientë
MRI: 11,250 pacientë
Mamografi: 1,219 pacientë
Ultrazë: 19,322 pacientë
TK Angjiografi: 1,316 pacientë
DSA (Angjiografi Digjital): 50 pacientë
Biopsi: 936 pacientë
Stroke/Trombektomi mekanike: 10 pacientë
Në total, klinika ka shërbyer për 120,684 pacientë (ky numër përfshin pacientët që kanë marrë më shumë se një shërbim, veçanërisht ata në urgjencë)”, tregoi ajo./FrontOnline/
