106 mijë e 924 është numri i qytetarëve që jetojnë në mërgatë e që janë regjistruar për të votuar në zgjedhjet e 9 shkurtit. Dy vendet me më së shumti votues të regjistruar janë Gjermania dhe Zvicra
Sipas një grafike të publikuar nga Radio Evropa e Lirë, kërkesa e 44 mijë e 774 qytetarëve që jetojnë Gjermani është pranuar për të votuar në këto zgjedhje.
Zvicra numëron plot 27 mijë e 248 qytetarë që janë regjistruar për votim.
Pas këtyre dy vendeve, në të tretin dhe të katërtin janë Franca dhe Suedia, ndërsa e pesta radhitet Austria.
Sot, Komisioni Qendror Zgjedhjeve ka bërë të ditur se ka filluar votimi përmes postës, për të gjithë ata, kërkesa e të cilëve është pranuar, dhe kjo zgjat deri më 8 janar.
Por, si duhet të votoni?
Të gjithë shtetasit e Kosovës që janë regjistruar për të votuar përmes postës, për të dërguar pakon me fletëvotim në kutinë postare të KQZ-së në Kosovë ose në ndonjërën nga kutitë postare të KQZ-së jashtë Kosovës, duhet të ndjekin udhëzimet e KQZ-së për votimin përmes postës.
1. Shkarkoni dhe printoni fletëvotimin.
2. Në anën e majtë të fletëvotimit janë të renditura subjektet politike. Zgjidhni vetëm një subjekt politik.
3. Në anën e djathtë, mund të votoni deri në dhjetë kandidatë.
Paloseni fletëvotimin, vendoseni brenda zarfit dhe mbylleni zarfin.
Mos shkruani asgjë mbi zarf!
Hapi 2: Dërgoni fletëvotimin
1. Printoni dëftesën e regjistrimit që e keni pranuar përmes email-it gjatë periudhës së regjistrimit.
2. Brenda zarfit të dytë, vendosni:
– Zarfin e mbyllur me fletëvotimin e plotësuar.
– Dëftesën e regjistrimit.
3. Mbi zarfin e dytë:
– Shënoni adresën e kutisë postare të KQZ-së (bashkangjitur në këtë email gjeni adresat e kutive postare të KQZ-së).
– Vendosni një pullë postare.
4. Dërgojeni zarfin në postën më të afërt të shtetit ku jetoni.
Kujdes! Që fletëvotimi juaj të jetë i vlefshëm:
– Dërgesa duhet të jetë individuale (nuk mund të përfshini fletëvotime për anëtarët e familjes apo persona të tjerë).
– Zarfi duhet të ketë pullën postare dhe të dërgohet nga shteti ku jeni regjistruar.
Këtë herë, KQZ-ja u ka mundësuar shtetasve të Kosovës, që jetojnë jashtë vendit, të votojnë edhe nëpër ambasada dhe konsullata të Kosovës në 22 vende të botës.
Vendvotimet në përfaqësi diplomatike dhe konsullore do të jenë të hapur prej orës 07:00 deri në ora 19:00, sipas kohës lokale në vendet përkatëse.
Qendrat e votimit në përfaqësi diplomatike të Kosovës për zgjedhjet për Kuvendin e Kosovës, që mbahen më 9 shkurt 2025, sipas Komisionit Qendror të Zgjedhjeve, janë në këto shtete:
Australi, Austri, Belgjikë, Çeki, Danimarkë, Francë, Gjermani, Holandë, Hungari, Itali, Kanada, Kroaci, Mal të Zi, Maqedoni të Veriut, Mbretëri të Bashkuar, Norvegji, Shtetet e Bashkuara të Amerikës, Shqipëri, Slloveni, Suedi, Turqi, Zvicër.
