Deklaratat e ushtrueses së detyrës së presidentit, Vjosa Osmanit për të marrë pjesë në zgjedhje me një listë të re zgjedhore, i ka komentuar politologu, Ramush Tahiri, i cili ka thënë se Osmani nuk ka kohë të mjaftueshme për të formuar parti të re, pasi që ka procedura ligjore që duhet t’i kalojë.

Tahiri ka thënë se e vetmja mundësi që ajo të merr pjesë në zgjedhje në këtë kohë, është përmes formimit të një iniciative qytetare, ku pas zgjedhjeve mund ta bëjë edhe parti, sikur se edhe partitë tjera.

“Për të krijuar një parti të re për zgjedhjet që do të mbahen, unë nuk besoj që ka kohë dhe nuk ma merr mendja që mundet me krijuar për shkak se duhet të kryhet obligimi ligjor, me u mbajtë Kuvendi, me u lëshuar statusi, me u leshu dokumentet, me u dërgua në KQZ, me u vërtetuar që është pak vështirë dhe nuk mundet me ndodhë, por edhe nuk ma merr mendja që mundet, a si iniciativë qytetare, sikurse që e kishte Vetëvendosja, mundet. Iniciative qytetare më pak nënshkrime, e dërgon në KQZ dhe e regjistron si subjekt politik, shkon në zgjedhje dhe më vonë bënë parti, por për këtë nuk ka kohë nëse mbahen zgjedhjet brenda dy-tre muajve”, ka thënë Tahiri.

Tahiri ka thënë se mbetët të shihet nga platforma e Vjosa Osmanit se a do të arrijë të krijoj ndarje nga LDK-ja dhe Vetëvendosja, por si dhe të ketë një arsyetim për elektoratin se pse ndahet nga LDK-ja dhe ofrohet me Vetëvendosjen.

“Sa do ta bëjë Vjosa Osmani ndarjen nga LDK dhe prej Vetëvendosje shihet në platformën e programit e saj që prezanton, varësisht prej asaj merret vota, kushtimisht, a merr vota si krah i LDK-së, ose si LDK e vërtete, sepse duhet ta ketë një arsyetim pse po ndahet prej LDK-së dhe pse po afrohet me Vetëvendosjen, sepse sa ishin në LDK ishin konkurrent me Vetëvendosjen”, thotë ai.

Ndërsa thotë se në rast se kjo shkon me një liste të vetën, dhe në rast se e kalon pragun, ajo do t’i bëjë dëme vetëm Vetëvendosjes dhe LDK-së në elektorat, sepse vota nga partitë tjera, ajo nuk do të mund të marrë.

“Vjosa Osmani me këtë kontekst mundet me e dëmton Vetëvendosjen, me ja marrë një pjesë të elektoratit, por mundet ta dëmtoj edhe LDK-në, ose të dyja nga pak.. sepse Vjosa nuk mundet t’i marrë votuesit e PDK-së, as Aleancës, domethënë këtyre dyjave ia merr votat, varësisht çfarë koncepti ndërton, njërës i merr vota më shumë ose më pak, nëse e kalon pragun”, ka thënë Tahiri.

Tahiri ka thënë se krejt kjo varet shtresën të cilën e synon Vjosa që të merr votat, si dhe varet edhe nga deputetët të cilët do të iu bashkohen Vjosa Osmanit, në rast se formon parti të saj./KP/