Boksierja kosovare Donjeta Sadiku i ka siguruar Kosovës medaljen e parë në Lojërat Mesdhetare “Taranto 2026”, pasi triumfoi në çerekfinale ndaj turkes Esmanur Lok.
Sadiku fitoi me vendim të ndarë të gjyqtarëve, 4:1, në një përballje shumë të fortë të kategorisë deri në 60 kilogramë.
Luftë e fortë deri në fund
Boksierja kosovare e nisi më mirë duelin dhe dominoi në raundin e parë, ndërsa Lok reagoi në të dytin.
Raundi i tretë solli shumë shkëmbime goditjesh, por Sadiku ishte më e saktë dhe dha goditjet më të pastra, duke bindur shumicën e gjyqtarëve.
Boksierja turke kishte avantazh në gjatësi dhe e shfrytëzoi atë në disa momente, por përvoja dhe qetësia e Sadikut rezultuan vendimtare.
Të paktën bronz, synimi është ari
Me kalimin në gjysmëfinale, Donjeta Sadiku e ka siguruar të paktën medaljen e bronztë.
Megjithatë, synimi i saj është dukshëm më i madh.
Në gjysmëfinale, të martën, ajo do të përballet me boksieren greke Sofia Legaki, me objektivin për të siguruar finalen dhe për të luftuar për medaljen e artë.
Në kategorinë deri në 60 kilogramë marrin pjesë vetëm gjashtë boksiere.
Sadiku mban gjallë shpresat e boksit kosovar
Në “Taranto 2026” kanë garuar edhe katër boksierë të tjerë nga Kosova, por të gjithë janë eliminuar në luftërat e para.
Kështu, Donjeta Sadiku mbetet përfaqësuesja që po mban gjallë shpresat e boksit kosovar në këtë edicion të Lojërave Mesdhetare.
Me medaljen tashmë të garantuar, ajo do të kërkojë që suksesi të bëhet edhe më i madh në gjysmëfinale.
