Na ndajnë vetëm pak ditë nga zgjedhjet parlamentare të 11 majit në Shqipëri dhe Komisioni Qendror i Zgjedhjeve po përgatitet intensivisht.

Këtë të hënë (28 prill) KQZ ka nisur testimin e pajisjeve të identifikimit elektronik të zgjedhësve (PEI).

Qëllimi i testimeve është shmangia e problematikave në ditën e zgjedhjeve të 11 majit, ku qytetarët do të zgjedhin përfaqësuesit e tyre në Parlament.

Nënkryetarja e KQZ-së, Lealba Pelinku, foli mbi ecurinë e procesit.

“Duhet kryer procedura e testimit operacional sot për të filluar më pas me përgatitjen e pajisjeve. Në protokollin e përgatitjes së pajisjeve janë parashikuar hapa shtesë për verifikimin e çdo pajisjeje që të jemi të sigurt që nga momenti që del nga magazina për t’ju drejtuar qendrave të votimit dhe të mos ketë probleme teknike.” tha Pelinku.

Nënkryetarja e KQZ-së, Lealba Pelinku, informoi se nga 5,225 qendrat e votimit në vend, 31 prej tyre nuk janë pajisur me operatorë që do të asistojnë qytetarët në kryerjen e procesit të identifikimit.

“Momentin që flasim kemi 31 qendra votimi për të cilët nuk kemi mundur të përzgjedhim operatorë, ndërkohë me ditët që kanë mbetur t’i mbulojmë edhe këto qendra”, tha ajo.

Më 11 maj, ashtu si në katër vitet e fundit, zgjedhësit do të identifikohen elektronikisht përmes pajisjeve PEI.

Çdo votues duhet të paraqitet në qendrën e tij të votimit me kartën e identitetit, e cila do të skanohet përmes pajisjes, bashkë me verifikimin e shenjës së gishtit.

Sistemi elektronik garanton që secili qytetar të ushtrojë të drejtën e votës vetëm një herë dhe vetëm në qendrën ku është i regjistruar./RTSh