Mbajtja e zgjedhjeve të parakohshme po shihet nga faktori ndërkombëtar si rruga e duhur për shtensionimin e situatës në Veri.

Ish-kryetari i KQZ-së, Mazllum Baraliu vlerëson se aktualisht kushte për mbajtjen e tyre nuk ka, por që s`është problem të krijohen ato.

“Kushte aktualisht nuk mendoj që janë kushtet të volitshme, por mund të krijohen ato nëse ka efekt takimi që ndodhi mes Presidentes Vjosa Osmani dhe homologut të saj, Aleksandër Vuçiq, ku prezent ishte edhe kryedyshja lidere franko-gjermane, Emmanuel Macron dhe Olaf Scholz”.

Dalja e qytetarëve nëpër qendrat e votimit kushtëzohet me disa procedura.

“Stabilitet, gjendja të jetë stabile, të ndodh dorëheqja e kryetarëve apo shkarkimi i tyre, varianti i tretë 20 % e elektoratit në Veri të deklarohet për zgjedhje të reja. Nëse do Vuçiq, zgjedhjet mbahen pa problem dhe serbët dalin në votime dhe do të kishte ligjitimitet kinse që po i mungojka tash, e që nuk mendoj se qëndron”, u shpreh Baraliu për “Front Online”.

Kryetari i Zveçanit: Nuk e kam ndërmend të jap dorëheqje

Kryetari i Zveçanit nga radhët e PDK-së, Ilir Peci tha se as që e mendon tash për tash dorëheqjen. Kurse kryetari tjetër nga ky subjekt, që drejton Zubin Potokun, Izmir Zeqiri nuk e ka hapur telefonin.

“Deri tash askush nuk ma ka kerku dorëheqjen, as Qeveria e as partia. Nuk e kam ndërmend më dhënë dorëheqje. Ftesën për dorëheqje e diskutoj me kabinetin tim”, u shpreh Peci për “Front Online”.

Dilema nuk kanë kryetarët veriorë të VV-së, Erden Atiqi në Mitrovicën e Veriut dhe Lulzim Hetemi në Leposaviq, që do të heqnin dorë nga posti me t`ua kërkuar Qeveria.

KQZ ka heshtur gjatë së hënës kur është pyetur nëse është e gatshme edhe për një palë zgjedhje te reja pas atyre të 23 prillit në Veri, çka do të nënkuptonte harxhime shtesë për këtë institucion që i organizon ato.

“Ka kosto financiare. Por kostoja s`duhet të jetë pengesë që të mbahet një proces demokratik”, potencoi Baraliu, njohës i procesit zgjedhor.

Tensionet në veri të Kosovës janë rritur kur më 26 maj Policia e Kosovës ka ndihmuar kryetarët shqiptarë të komunave Zveçan, Leposaviq dhe Zubin Potok të hyjnë në objektet komunale – gjë të cilën popullata vendase serbe e ka kundërshtuar ashpër.

Situata mbetet e njëjtë edhe pas 11 ditësh.