Presidenti ukrainas Volodymyr Zelensky tha të premten gjatë një takimi me zëvendëspresidentin e ShBA-së JD Vance se vendi i tij dëshiron “garanci sigurie” përpara çdo bisedimi për t’i dhënë fund luftës Ukrainë-Rusi.

Pak përpara se të ulej me Vancen në Konferencën e Sigurisë në Munih, Zelensky tha se do të pranonte të takohej personalisht me liderin rus Vladimir Putin vetëm pasi të negociohej një plan i përbashkët me Presidentin e ShBA-së, Donald Trump.

Trumpi ndryshoi mbështetjen e palëkundur shumëvjeçare të ShBA-së për Ukrainën këtë javë pas një telefonate me Putinin, kur tha se të dy udhëheqësit ka të ngjarë të takohen së shpejti për të negociuar një marrëveshje paqeje. Trumpi më vonë dukej se pranoi kërkesën e Zelensky që edhe ai të kishte një vend në tryezë.

Shumë vëzhgues, veçanërisht në Evropë, shpresojnë se Vance do të hedhë të paktën pak dritë mbi idetë e Trumpit për një zgjidhje të negociuar të luftës.

Edhe pas telefonatës së Putinit, Zelensky tha se beson se Trump është çelësi për t’i dhënë fund luftës dhe tha se presidenti i SHBA i dha atij numrin e tij të telefonit.