Lajme

Zbatimi i vendimit të Kushtetueses për Manastirin e Deçanit, Imeraj: Do të krijojë precedent të rrezikshëm

Zbatimi i vendimit të Kushtetueses për Manastirin e Deçanit, Imeraj: Do të krijojë precedent të rrezikshëm
20:00 | 20 Maj 2022

Pesë vendet e Quintit në Kosovë, Franca, Gjermania, Italia, Mbretëria e Bashkuar dhe Shtetet e Bashkuara të Amerikës, kanë kërkuar prapë nga Qeveria e Kosovës të fillojë zbatimin e vendimit të Gjykatës Kushtetuese për pronësinë e Manastirit të Deçanit.

Shkodran Imeraj, nga Lidhja e Historianëve të Kosovës, vlerëson se nëse zbatohet vendimi i Gjykatës Kushtetuese në lidhje me Manastirin e Deçanit, do të krijojë precedentë të rrezikshëm, pasi sipas tij, kjo do t’u mundësojë të gjitha kishave ortodokse prona në Kosovë, njofton Klankosova.tv.

“Nëse ndodh të zbatohet, Kosova ka hyrë në një precedent të rrezikshëm dhe mandej ne do të kemi kërkesa të kishave ortodokse, që do të kërkojnë prona gjithandej Kosovës, pra kjo është një çështje që të mos ndodhë”, është shprehur Imeraj.

Imeraj tregoi edhe kur ka filluar kjo çështje dhe si kanë ecur këto vendime përgjatë viteve.

“Fillimisht kjo çështje ka filluar në vitin 1993 dhe 1997, kur qeveria e atëhershme e Serbisë, me anë të dy vendimeve të ndara, i ka dhuruar pronat e dy ndërmarrjeve publike, manastirit, por në të dy vendimet, të 93’ dhe 97’, shkruan qartë në klauzolat përfundimtare se pronat do t’i barten manastirit në momentet kur do të krijohen kushtet e nevojshme ligjore”, shtoi ai.

“Lënda është bartur menjëherë pas luftës dhe në vitin 2001, ndërmarrjet janë ankuar në gjykatën komunale të Deçanit, e cila ka thyer ato vendime, dhe i ka kthyer në pronësi të ndërmarrjeve pronat, Manastiri i Deçanit më pas është ankuar në shkallën e dytë në gjykatën e qarkut në Pejë dhe gjykata në Pejë i ka dhënë të drejtë manastirit, pastaj lënda ka shkuar në dhomën e posaçme të gjykatës supreme, ku shkalla e parë e ka njohtë të drejtën e manastirit, teksa në shkallën e dytë e ka kthyer lëndën në pikën zero, duke iu dhënë të drejtë ndërmarrjeve në pronësi, dhe mandej lënda ka shkuar në gjykatën kushtetuese, në vitin 2016, kolegji i gjyqtareve të gjykatës kushtetuese dhe paneli ndërkombëtar dhe vendor, të cilët kanë marrë vendim duke ia njohur pronësinë manastirit”.

Ai potencoi se liderët kosovarë duhet të angazhohen më shumë në këtë çështje.

“Liderët e Kosovës duhet me qenë më të zotë, duke i bindur partnerët ndërkombëtarë që ky vendim nuk mund të zbatohet”./FrontOnline

Një delegacion i Prince Coffee viziton plantacionet e kafesë në Indi

Të tjera