Kryetarit të Komunës së Vushtrrisë, Xhafer Tahirit, i ka mbetur i padekoruar qyteti për festat e fundvitit, pasi që kompania e rekonduar për nënshkrim të kontratës “Elektro” ishte skualifikuar nga gara për shkak të borxheve ndaj Administratës Tatimore të Kosovës (ATK), raporton portali “Front Online”.

Pikërisht për shkak të dështimit të këtij tenderi, vlera e parashikuar e së cilit ishte rreth 6000 euro, Komuna e Vushtrrisë ka kërkuar nga Organi Shqyrtues i Prokurimit(OSHP) që operatorin ekonomik “Elektro” që të futet në listës të zezë të kompanive, me arsyetimin se me nënshkrimin e “Deklaratës nën betim” ka paraqitur deklarata jo të sakta.

Në seancën e planifikuar gjatë ditës së sotme të Organit Shqyrtues të Prokurimit, Hyda Dallku nga Komuna e Vushtrrisë ka deklaruar se  operatori ekonomik, kompania “Elektro” ka sjellë një dëshmi e cila rezulton se është obligues ndaj ATK-së.

“Autoriteti Kontraktues ka vlerësuar se nënshkrimi i deklaratës nën betim me të cilën operatori ekonomik ka siguruar Komunën e Vushtrrisë që i përmbushë kërkesat nuk është i sakt dhe si rrjedhojë kjo paraqet një fakt jo të sakt për Komunën, ku kompania “Elektro” ka qenë e papërgjegjshme”, ka deklaruar Dallku nga Komuna e Vushtrrisë.

Në anën tjetër, Ekrem Salihu, përfaqësues i kompanisë “Elektro”, e ka kundërshtuar kërkesën e Komunës së Vushtrrisë për futje në “listë të zezë”, duke thënë se kjo është e kundërligjshme.

“Është e qartë se për t’u futur në listë të zezë një operator ekonomik duhet të ofroj dëshmi të rreme, apo dokument të falsifikuar, gjë që në rastin konkret nuk ka as dëshmi të rreme e as dokumente të falsifikuara, por është një borxh ndaj ATK-së”, ka deklaruar përfaqësuesi i kompanisë “Elektro”.

Edhe eksperti shqyrtues, Visar Bibaj, ka deklaruar se kompania nuk ka dorëzuar as dokumente të falsifikuara as të dhëna të pavërtetë.

Por, me deklaratat e këtij të fundit nuk është pajtuar Saranda Cakaj nga Komuna e Vushtrrisë, e cila ka debatuar ashpër me panelin shqyrtues, të cilin e ka kryesuar Nuhi Paçarizi, duke thënë se kompania e rekomanduar për këtë tender ka gënjyer me rastin e nënshkrimit të deklaratës nën betim dhe për pasojë e ka lënë Komunën pa dekorim për festat e fundvitit.

Sipas Cakajt, kompania në fjalë duhet penalizuar që mos të marrë pjesë në tenderë së paku për një vit.

Vendimi i Panelit Shqyrtues për këtë aktivitet Prokurimit do të merret në ditët në vijim, deri sa portali “Front Online” do të iu mbaj të informuar në vazhdimësi për rrjedhën e këtij procesi të prokurimit.

/Front Online/