Volkswagen i Gjermanisë shiti 1.08 milionë makina të reja në Evropë vitin e kaluar, krahasuar me 649,514 automjete nga Peugeot. VW ishte e para në shitje në kontinent, pavarësisht një rënie prej 6.7% krahasuar me vitin 2020, sipas të dhënave të publikuara nga Shoqata Evropiane e Prodhuesve të Automobilave (ACEA).

Toyota kërceu në vendin e tretë me 615,142 makina të shitura me një rritje prej 9.1%, ndërsa në vitin 2020 ishte në vendin e tetë. Kompania ia atribuoi suksesin e saj përgatitjes së një zinxhiri furnizimi global, i cili përfshinte akumulimin e burimeve përpara se mungesat të goditnin industrinë.

Grupi Hyundai arriti rritjen më të lartë në Evropë në vitin 2021, dhe suksesi i prodhuesit korean rezultoi në rritje prej 21.1% dhe në vendin e 10-të në renditjen e përgjithshme të shitjeve.

Humbësit më të mëdhenj në 2021 ishin Alfa Romeo, e cila ra 27.8% me 26,322 shitje dhe Mitsubishi, i cili bëri 73,370 shitje pasi njoftoi se do të largohej nga Evropa më 2020. Ishte gjithashtu një vit i keq për Ford-in, i cili ka pësuar një rënie prej 19% në shitje që nga viti 2020.

Shitjet totale të makinave evropiane ranë 2.4% në 9.7 milionë, për të cilat ACEA tha se ishte “rezultat i mungesës së gjysmëpërçuesve që ndikoi negativisht në prodhimin e makinave gjatë gjithë vitit”. Industria është ende larg niveleve para pandemisë, me regjistrime në BE 3.3 milionë njësi më pak se në 2019.

Duke marrë parasysh Britaninë e Madhe dhe vendet e Shoqatës Evropiane të Tregtisë së Lirë, Islandën, Lihtenshtajnin, Norvegjinë dhe Zvicrën, shitjet ranë me 1.5%.

Numri i përgjithshëm i makinave të shitura ishte 11.77 milionë, krahasuar me 11.9 milionë në vitin 2020. Gjermania regjistroi shitje prej 2.6 milionë, e ndjekur nga Franca me 1.6 milionë, Britania e Madhe me 1.6 milionë, Italia me 1.4 milionë dhe Spanja me 859,477./FrontOnline/