Bashkimi Evropian ende s’ka ndonjë datë se kur do të rinisë dialogu i Brukselit mes Kosovës dhe Serbisë, i cili është bllokuar prej më shumë se një muaji për shkak të çështjes së Asociacionit të Komunave Serbe.
Një gjë të tillë për Gazetën Express e ka pohuar zëdhënësi i BE’së, Peter Stano. Ai ka thënë se janë duke punuar për takimet e radhës dhe se do t’i publikojnë datat në një kohë të përshtatshme.
“Është duke vazhduar puna për përgatitjen e takimeve të ardhshme në kornizën e dialogut. Ne do të njoftojmë për datat dhe agjendën e takimeve të ardhshme – qoftë në nivel ekspertësh, qoftë në nivelin më të lartë politik – kur të jetë e përshtatshme”, ka thënë Stano të mërkurën.
Gazeta Express i ka dërguar pyetje Koordinatorit shtetëror për Dialogun Skender Hyseni, për rifillimin e dialogut, por i njëjti nuk ka kthyer përgjigje.
Kjo ngecje drejt caktimit të takimeve të radhës vjen pavarësisht vizitës disa ditore të Miroslav Lajçak në Prishtinë dhe Beograd e cila duket se nuk ka dhënë rezultate sa i përket përafrimit të qëndrimeve mes të dy shteteve për çështjen e Asociacionit.
Edhe përkundër deklarimeve të Lajçak se pala kosovare ishte pajtuar për themelimin e Asociacionit, Prishtina zyrtare në reagimet e mëpasme kanë demantuar diplomatin sllovak duke përsëritur që qëndrimi për Asociacionin mbetet i pandryshueshëm.
Lajçak ka nxitur reagimet e krerëve të politikës kosovare edhe kur në Beograd ka përmendur ndryshimet Kushtetuese që duhet bërë, duke thënë se Kosova duhet të ndryshojë Kushtetutën me qëllim të arritjes së një marrëveshje finale.
Por nga Brukseli kanë thënë se Lajçak është keqkuptuar dhe se ai e ka pasur fjalën për dy shtetet që duhet të ndryshojnë Kushtetutën nëse duan të arrijnë marrëveshje finale.
“Z. Lajçak ka shpjeguar se çfarë ndodh nëse je duke e negociuar një marrëveshje ndërkombëtare. Kur arrin një marrëveshje ndërkombëtare, atëherë duhet të konsiderohen rregullimet e nevojshme ligjore nga qeveria, duke përfshirë edhe nivelin kushtetues, në mënyrë që ta integrojë atë në rendin ligjor dhe kushtetues. Dhe kjo vlen për Kosovën dhe Serbinë”, ka deklaruar Stano për Express të hënën.
Dialogu i Brukselit është bllokuar që nga shtatori, kur ka dështuar të mbahet takimi i caktuar për datën 27-të.
