Të enjten, shtabi i krizës së koronavirusit në Serbi ka shpallur disa masa të reja për frenimin e përhapjes së koronavirusit, por ka thënë se nuk do të zbatojë orën policore.
Kryeministrja Ana Bërnabiq ka thënë se tubimi i më shumë se dhjetë njerëzve në publik, do të ndalohet në Beograd, si në ambiente të mbyllura, ashtu edhe të jashtme.
Masat e tjera përfshijnë ruajtjen e distancës fizike dhe ndalimin e punës në objekte të mbyllura nga ora 21:00 deri në orën 06:00.
Ambientet e hapura, si parqet, do të mbyllen nga ora 23:00 deri në orën 06:00.
Serbia është në mesin e vendeve më të prekura nga koronavirusi në Ballkanin Perëndimor, me mbi 17,000 të infektuar dhe 341 viktima.
