presidentja Vjosa Osmani të hënën ka shkarkuar Valdete Dakën nga pozita e kryesueses së Komisionit Qendror të Zgjedhjeve. sot, Daka ka dalë në një konferencë për media nga ku ka deklaruar se vendimi për shkarkimine  saj është i padrejtë dhe i porositur.

Sipas Dakës, Presidentja Osmani ka përmbushur premtimin e dhënë gjatë fushatës së fundit zgjedhore për shkarkimin e saj.

“Tashmë të gjithë e dini se dje me vendimin e saj, Presidentja e Kosovës, ka përmbushur kërcënimin dhe premtimin e dhënë gjatë fushatës së fundit zgjedhore për shkarkimin tim. Dua t’iu bëj të ditur qysh në fillim se ky është një vendim jo kushtetues dhe i pa mbështetur në ligj. Këtë e them duke u mbështetur në faktet se arsyetimi i dhënë në shkarkimin tim, jo vetëm që është i paligjshëm, kontradiktor me vetëveten, por edhe qesharak. Ky vendim i Presidentes, i bërë publik pasditen e së hënës, shihet qartë se ishte përgatitur më herët. Këtë e dëshmon edhe fakti për emërimin brenda pak minutave të kryetarit të ri të KQZ-së”, ka deklaruar Daka.

Ndërkaq pas konferencës për media, disa nga anëtarët e KQZ-së e kanë përcjellë Dakën me lule, derisa ajo ka dalë nga objekti.