UEFA ka miratuar kërkesën speciale të Real Madridit përpara ndeshjes së kthimit të çerekfinales së Ligës së Kampionëve kundër Arsenalit.
“Los Blancos” janë në disavantazh 3-0 nga ndeshja e parë në “Emirates Stadium”, ku Declan Rice shënoi dy gola të jashtëzakonshëm nga goditjet e dënimit dhe Mikel Merino vulosi rezultatin me një përfundim të bukur.
15 herë kampionët e Evropës kanë nevojë për një rikthim të mrekullueshëm për të arritur në gjysmëfinale dhe mendimi i përgjithshëm është se skuadra e Carlo Ancelottit ka nevojë urgjente për një gol të hershëm nëse dëshiron të realizojë të pamundurën.
Arsenali nuk ka pësuar tre gola në një ndeshje që nga fitorja 4-3 ndaj Luton Toën sezonin e kaluar, por Real Madrid njihet për ngritjen në nivelet më të larta në netët e mëdha evropiane.
Dhe është zbuluar se Real ka marrë një shtysë të madhe pasi ka marrë leje nga UEFA për të bërë diçka që u pëlqen të bëjnë në ndeshje të mëdha.
UEFA dhe Real Madrid kanë konfirmuar për “SPORTbible” se klubi spanjoll ka marrë miratimin për të mbyllur çatinë në “Santiago Bernabéu”.
Stadiumi i rinovuar i Realit ka kushtuar një shumë marramendëse prej 1.5 miliardë £ dhe përfshin edhe një çati tërheqëse.
Ky funksion i dobishëm i jep mundësi Realit ta mbyllë çatinë dhe të krijojë një atmosferë të zhurmshme dhe imponuese duke mbajtur brenda zhurmën – gjë që mund ta bëjë më të vështirë ndeshjen për Mikel Artetën dhe ekipin e tij.
Për ndeshjet e La Ligas, Real ka të drejtën të vendosë nëse çatia do të mbyllet, por në Ligën e Kampionëve duhet të marrë miratim nga UEFA.
Vendimi duhet të merret përpara ndeshjes dhe nuk mund të ndryshohet gjatë ndeshjes apo në pushimin e pjesës së parë.
Ancelotti ka folur tashmë për ndikimin që ka çatia e mbyllur, duke komentuar: “Akustikisht është ndryshe, ka më shumë zhurmë, atmosferë shumë më të mirë, mendoj. Kjo mund të motivojë edhe më shumë ekipin.”
Real do të jetë pa Eduardo Camavinga pasi u ndëshkua me karton të kuq në ndeshjen e parë në Londrën e Veriut, por si Jude Bellingham ashtu edhe Vinicius Jr pritet të rikthehen në formacionin titullar.
Thuhet se Bellingham është përfshirë në një përplasje të ashpër në stërvitje me shokun e skuadrës Antonio Rudiger të premten.
Mesfushori anglez nuk ka komentuar mbi incidentin, por përpara ndeshjes së kthimit ai u dërgoi një mesazh tifozëve të klubit dhe shkroi: “Besoni! Shihemi të mërkurën Madridistas”.
