×
  • Bota/Rajoni
  • Bota/Rajoni

    Transformohet blloku i kufizuar nga rr. “Gjok Doçi”, “Demir Nazeri” dhe “Princ Vidi”

    FrontOnline
    30 Qershor 2020

    Një investim i munguar prej 30 vitesh bëhet realitet për banorët e Njësisë 11. Falë ndërhyrjes së Bashkisë së Tiranës, blloku që kufizohet nga rr. “Gjok Doçi”, “Demir Nazeri” dhe “Princ Vidi” është rikonstruktuar, duke ia ndryshuar faqen të gjithë zonës.

    Kryebashkiaku Erion Veliaj tha se ndryshimi është i paimagjinueshëm, pot ë kihet parasysh se më herët kjo zonë dukej si një tokë e bombarduar, si në gjendje shtetrrethimi. “Sot është si dita me natën”, tha ai.

    Duke renditur një sërë investimesh në zonat më të largëta të Tiranës, kryebashkiaku theksoi se është vetëm çështje kohe që të ndërhyhet në çdo rrugicë të qytetit. “Kemi vënë dorë edhe në periferi të Tiranës, nga Shëngjergji, ku në Bizë të Martaneshit ndahemi me Klosin dhe Matin, deri në estremin tjetër, ku ndahemi me Elbasanin; u bë rruga e Krrabës, investuam në lagjet e Ndroqit, po ashtu edhe shkolla e re ku ndahemi me Romanatin. Për sa kohë që qytetarët e kanë ndjerë dorën e bashkisë deri në periferinë më ekstreme, do të thotë që është vetëm çështje kohe, derisa të prekim çdo rrugicë”, nënvizoi ai.

    Veliaj përsëriti edhe sot apelin ndaj kompanive që operojnë në transportin urban të Tiranës, që të rikthejnë shërbimin ndaj qytetarëve. “Është jashtëzakonisht e rëndësishme që linjat të kuptojnë se kur kanë pasur nevojë për bashkinë, Bashkia ka qenë me ta. Kur kompanitë kanë pasur të drejtë, si në rastin e pandemisë, dhe hoqëm taksat, apo siç ishte rasti i mostaksimit të çdo autobusi, por vetëm një herë të kompanisë, që prapë dakordësuam dhe u dhamë të drejtë, ashtu duhet që ata t’i rikthehen shërbimit. Ajo që thonë disa kompani, se do e mbajnë licencën private, derisa të më dalë mua llogaria, nuk shkon sepse ajo licencë do të hiqet sepse s’po na del llogaria neve si qytetarë”, tha ai.

    Ndërkaq, Bashkia e Tiranës ka nisur monitorimin e frekuencës së autobusëve. “Këto tre ditë do t’i ndjek personalisht frekuencat. Kush nuk i realizon, le të shkojë në shtëpi të vajosë jahtin e tij, të shkojë me pushime; por, Tiranën nuk e mban dot peng. Nëse familjet tona, industria, të gjitha kompanitë, mbajtën një barrë të vështirësisë gjatë pandemisë, kjo lipset ta mbajnë edhe kompanitë e autobusëve. Do më kenë në krah teksa negociojmë me qeverinë edhe për rimbursimet e mundshme dhe për lehtësira të tjera, vetëm nëse fillimisht më japin të besoj që ata nuk e marrin për të mirëqenë mirësinë tonë, por që e marrin seriozisht afatin, urdhrin dhe ligjin për t’iu rikthyer punës”, deklaroi Veliaj.

    Kryebashkiaku dha një lajm të mirë për të gjitha ato familje që janë prekur nga tërmeti. Ai përsëriti se nga java tjetër do të nisë lidhja e kontratave me qytetarët, për të filluar më pas menjëherë me dhënien e pagesave cash. “Javën tjetër lidhen kontratat. Kjo është diçka e paprecedentë: ende pa kaluar 10 muaj nga dy tërmetet, jo vetëm kemi likujduar tërmetin e parë, por po likujdojmë edhe tërmetin e dytë. Në Shqipëri kemi jetuar të gjithë: Kanë kaluar 10 vjet nga përmbytjet në Shkodër dhe nuk u likujduan nga qeveria e mëparshme. Pra, do të thotë se kur shteti do, shteti bën. Si qeveria e Edit, edhe si Bashkia, duan dhe bëjnë edhe kur nuk është detyrim”, tha ai.

    Një tjetër lajm i shkëlqyer është nisja e garës për ndërtimin e 200 shtëpive të para në zonat rurale. “Do i bëjmë me blloqe: Tirana Lindje-Perëndim-Jug dhe Veri. Besoj është çështje ditësh derisa të hapim themelet e para të shtëpive. Javën tjetër nisim konsultimet me inxhinierët për të gjitha pallatet e dëmtuara. Do besojmë çfarë thonë inxhinierët, do ia paraqesim Këshillit Bashkiak, do e transmetojmë live, që çdo qytetar të jetë i garantuar se është marrë mendimi i ekspertit, siç ishte rasti i shkollës “Sami Frashëri”, ku ajo që po bëhet është shumë më e mirë”, u shpreh Veliaj.

    Ai siguroi qytetarët se nuk do të lëvizin nga lagjet e tyre dhe se pagesa e qirave do të vijojë gjersa ata të futen në banesat e reja. “Kush është në Kombinat, do vazhdojë të rrijë në Kombinat. Mund të ketë vetëm një kalim rruge ose rrugice, për të gjetur terrenin më të mirë dhe për të bërë hapësirat më dinjitoze, që nesër të shtojmë edhe shkollën, kopshtet e çerdhet, por ama do të rrimë sa më afër vendbanimit original. Derisa të vijë dita kur njerëzit të marrin në dorë apartamentin e tyre, Bashkia do ua paguajë qiranë, siç e ka paguar deri tani. Asnjë nuk do mbetet në rrugë”, siguroi Veliaj.

    Investimi i realizuar në bllokun që kufizohet nga rrugët “Gjok Doçi”, “Demir Nazeri” dhe “Princ Vidi” konsiston në rehabilitimin e plotë të zonës, duke përfshirë infrastrukturën nëntokësore, ashtu edhe atë sipërfaqësore me rrugë, trotuare, ndriçim, etj.

    “Frika ime është përballja me publikun”, thotë banori/banorja i/e 12-të i/e BBVK
    Nga Rubrika
    Bota/Rajoni28 Mars 2024
    Një aksident trafiku ka lënë të vdekur 45 persona në Afrikën e Jugut, pasi një autobus humbi kontrollin dhe ra nga një...
    Bota/Rajoni28 Mars 2024
    Aleanca për Shqiptarët e Ziadin Selës i bashkohet Frontit Evropian. Ky vendim erdhi pas mbledhjes së Kuvendit Qendror të kësaj partie. Pas...
    Bota/Rajoni28 Mars 2024
    Ajo që tronditi shumë një ekip ndërkombëtar mjekësh që vizitoi një spital në pjesën qendrore të Gazës, ishte numri i madh i...
    Të tjera
    Lajme28 Mars 2024
    Policia e Kosovës është bërë pjesë e Taskforcës së Përbashkët të Migracionit me autoritetet ligjzbatuese të Republikës së Shqipërisë dhe të Mbretërisë...
    Lajme28 Mars 2024
    Kryetari i Lidhjes Demokratike të Kosovës (LDK), ka folur në Kuvend të Kosovës për tenderët njëburimore. Opozita edhe gjatë seancës së fundit...
    Lajme28 Mars 2024
    Asamblisti i Vetëvendosjes në komunën e Gjilanit, Ismajl Kurteshi i ka mohuar të gjitha pretendimet për punësimin e nuses së kushëririt të...
    Lajme28 Mars 2024
    Një aksident mes një automjeti dhe një motoçiklete ka ndodhur sot në rrugën “Garibaldi” Prishtinë. Lajmin për Klankosova.tv e ka konfirmuar zëdhënësja...
    Lajme28 Mars 2024
    Zgjedhjet evropiane të vitit 2024 do të përcaktojnë kursin për një sërë gjërash. Sigurisht edhe për të ardhmen e BE-së. Sepse është...
    Lajme28 Mars 2024
    Bashkëkryesuesi i Komisionit Parlamentar për Stabilizim Asociim BE–Kosovë, Lukas Mandl ka deklaruar se Kosova i ka plotësuar të gjitha kushtet për anëtarësim...

    FrontOnline, © 2024 Të gjitha të drejtat e rezervuara.