Presidenti i vendit, Hashim Thaçi, është deklaruar pas takimit që pati me Kryeministrin Hoti, raporton Front Online.

I pari i vendit tha se kanë folur edhe për dialogun në të cilin proces u shpreh i bindur se do të punojnë së bashku me Kryeministrin.

Para gazetarëve, Presidenti tha se do të ulën bashkë me Hotin në dialogun kundër Serbisë.

Ai tha po ashtu se nuk janë në garë se kush do ta mbajë ‘bajrakun’ e dialogut, por janë në garë me Serbinë.

“Sapo përfunduam një takim. E njoftova për hapat e parë të heqjes së masave. Kosova është në drejtimin e duhur. Diskutuam për rimëkëmbjen ekonomike. Ishte edhe pikë tjetër koordinimi për hapat që do t’i marrim në sferën e jashtme. Jemi në një javë të rëndësishme. Do të punojmë ngushtë si President dhe Kryeministër për dialogun Kosovë-Serbi. Kërkojmë që ky proces të mbyllet me njohje reciproke dhe anëtarësim në NATO dhe OKB. Nuk është koha të hapim çështje teknike. Në Kushtetutë janë të sqaruara shumë qartë rolet tona si President dhe Kryeministër. Do të ulemi bashkë përballë Serbisë”, theksoi ai.

Ai ka treguar se kanë diskutuar edhe për situatën me pandeminë Covid-19.

“Diskutuam edhe për hapat që duhet të ndërmerren nga institucionet përkatëse për respektimin e plotë të rekomandimeve të IKSHPK-së sa i përket Covid-19. Besoj se institucionet e vendit dhe vetë Ministria e Shëndetësisë do t’i ndërmarrin të gjitha hapat e nevojshëm që të kalojmë sa më lehtë dhe më mirë, gjithmonë duke respektuar rekomandimet e IKSHPK-së”./Front Online/

https://www.facebook.com/FrontOnlineMedia/videos/1164282690621716/