Feim Pulaj në vitin 2020 e bleu kompaninë “Advan Tech”.

Krahas aksioneve, ai trashëgoi edhe një kontratë, të cilën biznesi në fjalë para se ky ta blente e kishte lidhur me Telekomin e Kosovës.

Bëhet fjalë për një marrëveshje, sipas të cilës të dyja palët pajtoheshin të ofronin shërbime të përbashkëta kabllore, interneti e telefoni për 7 vjet.

Ujdia që u nënshkrua më 6 dhjetor të 2019-s nuk u zbatua kurrë nga ana e Telekomit, ani pse në kopjen e siguruar nga “Front Online” thuhet se ajo hyn në fuqi pikërisht në ditën e nënshkrimit.

“Advan Tech ka investu, janë investime milionëshe, janë blerë serverat, platformat, janë investu pajisje, por Telekomi nuk po na lëshon sinjalin, nuk po na përgjigjen, na injorojnë. Më 1 tetor e kanë shpall për të njëjtën kontratë që e kemi ne, Telekomi e kanë shpall me ja dhanë tjetërkujt”, theksoi Feim Pulaj, pronar i kompanisë “AdvanTech”.

Për këtë veprim të fundit të Telekomit, biznesmeni shqiptar nga Zvicra Feim Pulaj i është drejtuar përmes një emaili me 8 tetor Burbuqe Hanës, drejtoreshë në këtë ndërmarrje publike dhe Ministres së Ekonomisë, Artane Rizvanolli.

Nga to ka kërkuar që të heqin dorë nga shpallja e kontratës së re dhe ta zbatojnë këtë aktualen me kompaninë e tij.

Ndryshe thotë se kontesti mes tyre do të zgjidhet në organet e drejtësisë.

“Kjo na e hap rrugën me shku në Arbitrazh. Ne nuk jemi të interesuar të shkojmë në Arbitrazh. Jemi të interesuar me shku me punu. Kur e kam marre em ec përpara, me ec përpara Telekomi, jo me dëmtu atë”, u shpreh Pulaj.

Front Online ka dy ditë që ka drejtuar pyetje në Telekom rreth moszbatueshmërisë së kësaj kontrate, por nuk ka marrë përgjigje.

Modeli i kësaj marrëveshjeje komerciale është “share-revenue”.

Ky model nënkupton ndarjen e të hyrave mes partnerëve.

Në këtë rast 60 për qind të të hyrave nga shërbimet IPTV do t’i marrë kompania, 40 % Telekomi.