Mustafë Mustafës nuk i është caktuar masa e paraburgimit. Ndërsa, vëllai i tij, Avni Mustafa do të kalojë 30 ditë në paraburgim.
Kështu vendosi të martën Gjykata Themelore në Prishtinë për sa i përket kërkesës së Prokurorit të Shtetit për dy të dyshuarit për vrasjen e rëndë që ndodhi më 18 mars në Arbëri, ku humbi jetën një 65 vjeçar.
Në aktvendimin, që ka siguruar Front Online, thuhet se për Mustafë Mustafën nuk është vërtetuar dyshimi i bazuar se ka kryer vepër penale ashtu siç pretendon prokuroria vrasje e rëndë.
Avokati i Mustafës, Skender Musa e ka konfirmuar po ashtu lajmin.
“Pra gjatë shikimit të provave dhe video-inçzimeve është vërtetuar se Mustafë Mustafa mund të trajtohet si palë e dëmtuar, por asnjë mënyrë si palë e dyshimtë për kryerjen e veprës penale. Nuk ka pasë armë të ftohtë apo të nxehtë. Vetëm ka vepruar në mbrojtje të jetës së tij dhe vëllaut të tij. Të gjitha këto i ka bërë me duar, për çka edhe ka pësuar dëmtime. Ka plagë mbi veshkë”, theksoi Musa.
Ndërkaq, për të dyshuarin Avni Mustafën, avokati Musa tha gjykata tha se ia ka caktuar masën e paraburgimit edhe pse sipas tij, i njëjti nga shkresat e lëndës kuptohet se ka vepruar në mbrojte të nevojshme.
Policia e Kosovës kishte njoftuar se të shtunën në Arbëri të kryeqytetit, saktësisht në një hotel pati të shtëna me armë zjarri.
Policia ka thënë se menjëherë në vendin e ngjarjes kanë dalë njësitet e nevojshme policore dhe ekipi mjekësor dhe aty bazuar në të dhënat fillestare nga arma e zjarrit lëndime ka pësuar një person, i cili në vendngjarje ka ndërruar jetë e se vdekjen e tij është konstatuar edhe nga ekipi mjekësor.
Dy të plagosurit me thikë, që ishin edhe të dyshuar për vrasjen, u trajtuan në spital.
Janë jashtë rrezikut për jetë dhe gjendja e tyre është stabile, njoftuan Emergjenca më 18 mars.
Front Online do të sjell tek ju edhe detaje tjera rreth motivit që çoi deri tek rasti tragjik.