Inspektorati Policor i Kosovës bën të ditur se ka suspenduar dy zyrtarët policorë pasi dyshohet se ushtruan dhunë mbi një qytetare.

Suspendimi erdhi pas rastit i cili u publikua, ku shihej një zyrtare policore duke ushtruar dhunë fizike ndaj një vajze që besohet se është e mitur, në Vushtrri.

Ngjarja ka ndodhur në afërsi të një shkolle, ndërsa përveç polices në rast ka qenë i përfshirë edhe një koleg i saj (të dy hetues), i cili shihet deri sa qëndron duke e shikuar kolegen.

Ky është njoftimi i plotë i IPK-së:

IPK rekomandoi suspendimin për dy zyrtarë policorë të dyshuar për keqtrajtim gjatë ushtrimit të detyrës zyrtare

Inspektorati Policor i Kosovës ka filluar një hetim sipas detyrës zyrtare sot pas publikimit të një video-incizimi me dyshim për tejkalim të autorizimeve policore gjatë përdorimit të forcës nga dy zyrtarë policorë në një incident që ka ndodhur në Vushtrri në orët e pasdites.

Hetuesit e IPK-së pas publikimit të videos në medie janë angazhuar duke ndërmarrë veprime hetimore lidhur me këtë rast që kanë përfshirë marrjen e deklaratave si dhe sigurimin e disa video incizimeve.

Pas disa veprimeve hetimore fillestare, hetuesit e IPK-së kanë rekomanduar suspendimin e  dy zyrtarëve policorë (një zyrtare policore dhe një rreshter policor)  që janë përfshirë në këtë incident.

Në konsultim me prokurorin kompetent për këtë rast do të zhvillohet një hetim në procedurë të rregullt me dyshimin se zyrtarët policorë të stacionit policor të Vushtrrisë kanë kryer veprën penale “keqtrajtim gjatë ushtrimit të detyrës zyrtare”.

Veprimet e mëtutjeshme hetimore lidhur me këtë rast për të sqaruar rrethanat e këtij incidenti do të vazhdojnë nga hetuesit e IPK-së në konsultim të vazhdueshëm me prokurorin përgjegjës.