Një stuhi e fortë me shi të dendur që ka goditur disa pjesë të Sidneit prej ditësh po largohet nga qyteti, treguan sot imazhet satelitore, megjithëse nivelet e lumenjve mbeten mbi nivelet e rrezikshme, duke bërë të nevojshme evakuimin.
Në përmbytjen e tretë të madhe të Australisë këtë vit, më shumë se 85,000 njerëz në Uellsin e Ri Jugor, shumica e tyre në periferitë perëndimore të Sidneit, iu tha ose të evakuoheshin ose u paralajmëruan se mund të urdhëroheshin të evakuoheshin.
“Është një situatë e rrezikshme dhe ne duhet të reagojmë siç duhet,” u tha gazetarëve kryeministri Anthony Albanese dhe njoftoi një pagesë urgjente prej 680 dollarë Australianë për banorët e prekur nga përmbytjet gjatë një vizite në periferi të Windsor, e cila pësoi përmbytjen e tretë të madhe këtë vit.
Moti në bregun lindor të Australisë ka qenë nën ndikimin e fenomenit La Nina për dy vjet me radhë, i cili zakonisht shoqërohet me reshje më të larta.
Stuhia po lëviz nga bregu lindor i Australisë në bregun qendror verior të Uellsit të Ri Jugor, duke mbuluar më shumë se 300 kilometra dhe Byroja e Meteorologjisë parashikon se në disa vende do të bien më shumë se 200 milimetra shi në gjashtë orë.
Reshjet e dendura të shiut që nga e shtuna kanë vazhduar të derdhin ujë në pellgjet e lumenjve rreth Sidneit, tashmë me kapacitet të afërt përpara përmbytjes së fundit, dhe autoritetet kanë paralajmëruar se kriza e përmbytjeve mund të shtrihet në fillim të javës së ardhshme.
Disa zona të Uellsit të Ri Jugor kanë marrë deri në 700 mm reshje që nga e shtuna – tashmë më shumë se mesatarja vjetore në vetvete – por kushtet kanë filluar të lehtësohen në Sydney.
“Ne po shikojmë disa kushte të thata (në Sydney) nesër dhe më pas të premten, shira të lehtë që do të kthehen gjatë fundjavës, por asgjë aq e rëndë sa kemi parë,” tha meteorologu Jonathan How për Australian Broadcasting Corp./FrontOnline/