Deputetja e LDK-së, Doarsa Kica-Xhelili dhe ministrja e Drejtësisë, Albulena Haxhiu kanë debatuar ashpër pikën për ndryshimin e Kodit të Procedurës Penale, në temën e dhunuesve në familje, dhe masat që duhet të merren ndaj tyre.
Fillimisht, Haxhiu iu drejtua Kica-Xhelilit me fjalët: “kjo është qesharake”, teksa potencoi gjithashtu se ajo kishte pritur unifikim për ndëshkim të dhunës në familje.
“Kjo është qesharake Doarsë. Kam prit unifikim për ndëshkimin e dhunës në familje. Prandaj, lejani avokatëve le ta mbrojnë dhunuesin. Dhe s’jam kundër se është detyrë e tyre. Ti më shumë fole qysh me mbrojtë dhunuesin se sa qysh me mbrojtë viktimën. S’ka pasë konsultime publike e as paraprake. Kjo sepse t’u e marrë parasysh rastet e raportuara të dhunës në familje, edhe pse që një përqindje e vogël po raportohet”, tha Haxhiu.
“Në vend që të unifkohemi, ju përmendni shtetet e zhvilluara ku funkisionon sundimi i ligjit. Po të funkisiononte edhe këtu, prokuroria nuk do të kishte lëshuar në procedurë të rregullt. Ja për çka po bëhet fjalë.Hallkat elektronike, nëse ti s’e ke seriozisht, unë e kam. Në 2015-ën ka hyrë në fuqi Ligji për Mbikëqyrje Elektronike, s’ka hy në fuqi. Je në LDK, mos u distanco. Është hera e parë që Qeveria Kurti e zbaton këtë”, shtoi ajo.
Në anën tjetër, deputetja Kica-Xhelili tha se nëse është legjitime të lejojmë paraburgimin automatik, pse s’e lejojmë vetëgjyqësinë.
“Sapo e dëgjuam ministren e Drejtësisë që na tha s’kemi nevojë për praktikën e Strasburgut dhe Konventën Evropiane për të Drejtat e Njeriut. Në qoftë se qenka legjitime të lejojmë paraburgimin automatik, pse s’kemi lejuar vetëgjyqësi? Pse zonja minsitre s’po e lejon vetëgjyqësinë. Pse s’po i lejon të gjitha gjërat që i ndalon Konventa?”, u përgjigj Kica – Xhelili.