Federata e Sindikatave të Shëndetësisë të Kosovës (FSSHK) do ta padisë ministrin e Financave, Hekuran Murati, raporton Front Online.

Kryetari i kësaj Sindikate, Blerim Syla, i ka quajtur skandaloze deklaratat  Murati, i cili tha se kjo sindikatë është e kapur dhe ka synime politike.

Sipas Sylës, ministri Murati ka thënë gjëra të pabazuara dhe ka bërë shantazh  e ndërhyrje në organizimin sindikal, e që siç tha ai, janë të dënueshme me kodin penal.

“Ne do të bëjmë padi në emër të federatës. Ai ka atakuar dhe ka thënë gjëra të pabazuara dhe shantazh. Ka bërë ndërhyrje në organizimin sindikal që është i dënueshëm me kod në Kosovë. Sot jemi duke u marrë me grevë dhe përgjigja më e mirë ndaj deklaratës së tij është greva e sotme e punëtorëve që është duke u zhvilluar në Republikën e Kosovës. Nesër do t’i fillojmë përgatitjet për padi, avokatët janë duke u marrur me këtë çështje, padi do të ketë”, ka thënë ai për Front Online.

Ministri Murati tha se FSSHK ka pranuar mbi 3 milionë euro në emër të kontributeve që u janë ndalur nga paga personelit shëndetësor dhe u janë transferuar FSSHK-së derisa ka hedhur dyshime se ndonjëherë personeli shëndetësor janë njoftuar se ku kanë shkuar këto para.

Ndërkaq të gjitha këto i ka hedhur poshtë kryesindikalisti i Shëndetësisë, Blerim Syla.

“Ne jemi duke e përgatitur një padi për deklarata që i ka bërë skandaloze, se sa ka nda mjete për punëtorët shëndetësor më së miri tregon reagimi i sotshëm që 100 % e punëtorëve shëndetësor janë në grevë”, ka thënë Syla për Front Online.