Duke marrë parasysh se jemi në stinën dimërore kur kriza energjetike është më e dukshme në gjithë botën, KEDS ju ka ofruar qytetarëve disa këshilla rreth kursimit të energjisë elektrike, rrjedhimisht shpenzimeve në këtë pjesë.
Sipas njoftimit të KEDS, qytetarët kanë mundësi të kursejnë deri në 30 për qind të faturës së rrymës vetëm nga ngrohja.
Në njoftim, KEDS ka bërë të ditur hapat që qytetarët duhet të ndërmarrin në vendbanimet e tyre në mënyrë që të kursejnë shpenzimet sa i përket energjisë elektrike.
Njoftimi i plotë:
E tërë Evropa tashmë ka vendosur kaldatë e ngrohjes në maksimum 21 gradë Celsius. Kjo temperaturë llogaritet idealja kur kihet parasysh kriza elektroenergjetike që ka përfshirë tash e një kohë të gjatë kontinentin e vjetër, pasiguria e çmimeve dhe e furnizimit me energji elektrike dhe rritja e kërkesës në anën tjetër.
Jemi në dimër, i cili deri tash ishte mjaft miqësor. Por, shumë shpejt pritet të vijë i ftohti, duke u bazuar në parashikimet e meteorologëve. Me ardhjen e të ftohtit, nevoja për ngrohje rritet. E bashkë më të, rritet edhe pasiguria e furnizimit me energji eektrike, pasi çmimet në tregjet ndërkombëtare kur po rritet kërkesa, po fluturojnë.
Në këto rrethana, kursimi është i domosdoshëm, madje jetik.
Hapi i parë duhet të jetë ulja e temperaturës në termostatin e kaldajës suaj. Nëse e ulni nga 24 gradë Celsius në 21 gradë Celsius, ekspertët tanë sigurojnë që ju do të kurseni deri në 30 për qind të faturës suaj. Vende të ndryshme kanë vënë kufij maksimalë edhe më të ulët, madje duke shkuar deri në 19 gradë Celsius, siç është rasti i Britanisë së Madhe. Në këto raste, ju do të kursenit edhe më tepër, pasi që dihet se nëse ngroheni me energji elektrike, atëherë ngrohja merr pjesë me minimum 70 për qind të konsumit tuaj mujor.
Në vende të ndryshme praktikohet edhe ndalja komplete për 2 orë, pasi llogaritet që nuk e ftohë fare ambientin. Këtë konsumatorët mund ta bëjnë në një periudhë të caktuar brenda ditës, në mënyrë që të lehtësohet barra e sistemit elektroenergjetik dhe të kursehet edhe direkt fatura e tyre. Nëse kjo ndalesë praktikohet çdo ditë, atëherë llogaritet që do të kurseni 30- 70 euro të faturës suaj mujore. Kjo është një strategji që në terma ndërkombëtare njihet si win-win, pra ku fitues janë të gjithë.
T’i përmbahemi këtij rregulli të thjeshtë për të mirën e të gjithëve. Së bashku mund t’ia dalim!
