Në ditën e zgjedhjeve do të jenë gjithkah nëpër Kosovë.
E 14 shkurti, ekipet e Komisionit Qendror të Zgjedhjeve do t`i gjejë për disa orë edhe në burgje me të burgosurit.
Arsyeja është e qartë.
“Në ditën e Zgjedhjeve KQZ-ja dërgon ekipet mobile në adresë të këtyre votuesve që edhe këta qytetarë të mund të shfrytëzojnë të drejtën e votës”, u shpreh për Front Online, Valmir Elezi, zëdhënës në KQZ.
Për pjesën tjetër do të përkujdeset Shërbimi Korrektues.
“Shërbimi Korrektues së bashku me KQZ-në organizojnë zgjedhje brenda institucioneve korrektuese. Shërbimi korrektues siguron hapësirat votuese, ndërsa KQZ-ja listat dhe materialet zgjedhore”, tregon për Front Online, Florent Gashi, zëdhënës në Shërbimin Korrektues të Kosovës.
Aktualisht në Kosovë janë gjithsej 1 mijë e 445 të burgosur.
Vetëm pasi të përfundojë regjistrimi i tyre në KQZ me 18 janar do të dihet saktë se sa nga ta kanë të drejtë vote.
KQZ-ja këtë të drejtë do t`ua ofrojë edhe disa kategorive tjera që nuk kanë mundësi të dalin nëpër qendrat e votimit në ditën e zgjedhjeve.
Atë, nga ky institucion thonë se do ta gëzojnë edhe personat me sëmundje e aftësi te kufizuara, pacientët nëpër spitale si dhe pleqtë që ndodhën në shtëpitë e të moshuarve.
Por jo vetëm.
“KQZ-ja përveç këtyre personave me nevoja të veçanta do të mundësojë votimin edhe të qytetarëve që kanë të drejtë vote, por që fatkeqësisht mund të jenë të infektuar me COVID-19 dhe që në ditën e zgjedhjeve nuk mund të shkojnë në vendvotimin e tyre për shkak të masës kufizuese sepse duhet të qëndrojnë në karantinë shtëpiake”, tregoi Elezi.
Regjistrimi i kësaj kategorie të votuesve do të zgjasë 9 ditë – nga data 2 deri me 11 shkurt./FrontOnline/