[wp-story]

Lajme

Shtyhet seanca për vrasjen e Agonis Tetajt pas kërkesës së Besnik Berishës

Shtyhet seanca për vrasjen e Agonis Tetajt pas kërkesës së Besnik Berishës
12:07 | 21 Prill 2021

Seanca e shqyrtimit gjyqësor ndaj Shaban Gogajt, të akuzuarit për vrasjen e Agonis Tetajt nga Deçani, e cila ishte caktuar të mbahet sot, është shtyrë për një datë tjetër.

Berat Tmava, avokat i familjes së Agonis Tetajt, ka thënë se Besnik Berisha, avokat i të akuzuarit për vrasje ka kërkuar që të shtyhet seanca.

Avokati mbrojtës i të akuzuarit ka bërë kërkesë të shtyhet me arsyetimin se i ka pasur dy seanca tjera dhe nuk ka mundur t’i shtyjë. Me kohë edhe me rregull na ka njoftuar gjykata për shkaqet e shtyrjes së seancës, nuk ka asnjë shkelje, është legjitime.

Seanca e radhës ndaj të akuzuarit është caktuar të mbahet më 7 maj.

Ndryshe, Gjykata Themelore në Pejë ka vendosur që të rihapë seancën e shqyrtimit gjyqësor për rastin ku Shaban Gogaj po akuzohet nga Prokuroria e Pejës për vrasjen e tani të ndjerit Agonis Tetaj, në shtatorin e vitit 2018, në kompaninë “Gogaj Ag”.

Gogaj akuzohet edhe për veprën penale të armëmbajtjes pa leje, ashtu sikurse edhe i pandehuri Isuf Cacaj.

Pas rikualifikimit të veprës penale nga prokurori i Prokurorisë së Gjilanit, Agron Uka, nga vrasje e rëndë në vrasje nga pakujdesia, i akuzuari Shaban Gogaj, në seancën e 16 marsit, e ka pranuar fajësinë për veprën në fjalë.

Në këto rrethana, kryetarja e trupit gjykues, Violeta Husaj-Rugova, kishte marrë vendim për aprovimin e pranimit të fajësisë dhe shpalljen e aktgjykimit e kishte caktuar për 19 mars.

Mirëpo, gjykata ka vendosur që me 21 prill të këtij viti të mbahet seanca e shqyrtimit gjyqësor, pasi u shpall i papërfunduar ky gjykim.

Kryetarja e trupit gjykues, Violeta Husaj-Rugova, ka njoftuar se revokohet aktvendimi për pranimin e fajësisë dhe se të akuzuarit Gogaj i është vazhduar masa e paraburgimit.

Ndërkaq, me vendimin e Kryeprokurorit të Shtetit, Aleksandër Lumezi, për ndërrimin e prokurorit, kjo lëndë tani i është caktuar prokurorit Isuf Sadiku.

Ndryshe, këtë çështje penale deri më tani e ka përfaqësuar Prokuroria e Gjilanit, pasi kryeprokurori i Apelit, Haxhi Dërguti, kishte aprovuar propozimin e mbrojtjes së të pandehurit, duke përjashtuar Prokurorinë e Pejës nga trajtimi i këtij rasti, me arsyetimin e trajtimit të njëanshëm të rastit.

Sipas aktakuzës të ngritur nga Prokuroria Themelore në Pejë më 12 qershor 2019, e të ricilësuar më 16 mars 2021, e akuzon të pandehurin Shaban Gogaj se më 23 shtator 2018, rreth orës 11:05:31, në Deçan, në rrugën “Luan Haradinaj”, në kompaninë “Gogaj Ag”, nga pakujdesia i pandehuri Gogaj, e privon të ndjerin nga jeta, Agonis Tetaj.

Sipas ricilësimit, gjersa i pandehuri ishte duke komunikuar në telefon me Natyra Melaj, vajzën e hallës rreth shkuarjes së tij në bjeshkë, duke e porosit që të merrte gjësende ushqimore, posa e përfundon këtë bisedë, e lëshon telefonin në tavolinë, nga karrika në skajin e majtë të banakut ku ishte ulur, kalon  në karrigen tjetër që gjendet në mes të banakut, lakohet duke shikuar në anën e djathtë kah dritaret në drejtim të rrugës dhe nxjerr nga sirtari i tretë i anës së djathtë, revolen e llojit “Beretta”, Model 92 FS, e vendos karikatorin në armë, e reperton të njëjtën dhe shkrep një herë në drejtim të : Asgan Hadërgjonaj, Agonis Tetaj e Faruk Zukaj, të cilët kanë qenë në distancë rreth 70 cm në mes vete, ndërsa në raport me të pandehurin distance ka qenë 4-5 metra, dhe nga kjo shkrepje, e godet tani të ndjerin Agonis Tetaj në mollëzën e djathtë të fytyrës, e pas këtij veprimi i njëjti kthen armën ku e ka marrë duke e kap kokën me dy duart, duke menduar se ka shkrep me armën me gaz, për të cilën paraprakisht e ka njoftuar xhaxhi i tij, Isuf Cacaj, se arma me gaz ndodhet aty, i njëjti këtë veprim nuk e ka dëshiruar as pasojën e shkaktuar, përkatësisht pasoja shkaktohet kundër vullnetit të tij, si rezultat i moskujdesit apo indiferencës apo jo seriozitetit të tij, ashtu që përkundër përpjekjeve për ofrimin e ndihmës, tani të ndjerit Agonis, i njëjti nuk ka mundur të mbijetoj plagës.

Me çka ka kryer vepër penale “Vrasje nga Pakujdesia, nga neni 181 të KPRK-së.

Përveç kësaj, i pandehuri Gogaj akuzohet edhe për veprën penale të armëmbajtje pa leje.

Në këtë rast, për armëmbajtje pa leje akuzohet edhe Isuf Cacaj, ku sipas aktakuzës, më 23 shtator 2019, rreth orës 14:50 në Deçan, në shitoren “Gogaj AG”, ka mbajt në pronësi armë dhe atë pistoletën e tipit “Bloë TR 92”, e kalibrit 9mm, e gjetur nga policia në sirtarët nën banakun e arkës.

Ndryshe, Instituti i Kosovës për Drejtësi (IKD), më 18 mars, ka reaguar ndaj zhvillimeve në çështjen penale ku i akuzuar për vrasjen e tanimë të ndjerit Agonis Tetaj është Shaban Gogaj, duke kërkuar që ndaj ish-kryeprokurorit të Prokurorisë së Apelit, Haxhi Dërguti, të iniciohen procedurat penale dhe disiplinore.

Kurse Kryeprokurori i Shtetit, Aleksandër Lumezi, ka kërkuar nga trupi gjykues të mos e shpallë shqyrtimin gjyqësor të përfunduar, por të marrë prova të tjera të nevojshme, të cilat sipas tij do ta zbardhin tërësisht të vërtetën në këtë çështje penale-juridik, si dhe ka vendosur që të ricaktojë prokurorin e ri për këtë lëndë, raporton “Betimi për Drejtësi”.

Tutje, Zyra e Kryeprokurorit të Shtetit, përmes një njoftimi për media, ka bërë të ditur se ka kërkuar nga kryeprokurori i Prokurorisë Themelore në Gjilan, Arben Kadriu, që të ndërmarrë të gjitha veprimet e nevojshme sipas ligjit për përgjegjësinë disiplinore të gjyqtarëve dhe prokurorëve ndaj prokurorit, Agron Uka.

Comodita nis 35 kontejnerë me dyshekë për në SHBA

Të tjera