Që nga mbrëmë në orën 22:12 nuk ka ndryshuar asgjë.
Kjo ishte ora kur Komisioni Qendror i Zgjedhjeve ka bërë përditësimin e fundit të rezultatit në faqen e saj.
Ende nuk dihet se sa do të zgjasë procesi i numërimit të votave për ata që garuan për Kuvendin e Kosovës, ndërkohë që disa komuna ende nuk kanë filluar numërimin, pasi duhet të kryejnë përgatitjet teknike dhe administrative të nevojshme.
Edhe 7 vendvotime kanë mbetur të paprocesura për të përfunduar procesi i numërimit të votave të rregullta për zgjedhjet.
Nga 2533 vendvotime, deri të mërkurnë në orën 22:12 janë procesuar 2526 ose 99.72 për qind.
Nga procesimi i 2526 vendvotimeve, Lëvizja Vetëvendosje ka 40.84 për qind të votave, apo 341 mijë e 672 vota. Partia Demokratike e Kosovës ka marrë 184 mijë e 499 vota apo 22.05 për qind. Lidhja Demokratike e Kosovës mbetet e treta me 17.67 për qind apo 147 mijë e 827 vota. Koalicioni AAK-Nisma, konservatorët dhe intelektualët ka marrë 62 mijë e 309 vota apo 7.45 për qind, si subjekti i fundit që ka siguruar kalimin e pragut prej 5 për qind. Lista Serbe ka marrë 38 mijë e 83 vota ose 4.55 për qind. Ndërsa Koalicioni për Familje ka marr 2.26 për qind ose 18 mijë e 905 vota.
Ndërkohë numërimi i votave të kandidatëve për deputetë ka nisur të mërkurën edhe në 14 komuna, krahas Prishtinës, Lipjanit, Obiliqit e Parteshit, ku numërimi ka nisur një ditë më parë.
Në 20 komuna të tjera, ky proces ende nuk ka nisur. Tek e kanë justifikuar vonesën me ndërlikueshmërinë e procesit, në Komisionin Qendror të Zgjedhjeve kanë thënë se para shpejtësisë së shpalljes së rezultateve, rëndësi ka saktësia e procesit.
Uebfaqja e KQZ-së që nga nisja e numërimit ka pasur probleme në shfaqjen e numrave. Në mbrëmjen e 9 shkurtit, KQZ-ja njoftoi se të dhënat nuk duhet të merren parasysh për shkak të telasheve me faqen. Në mëngjesin e së hënës, KQZ-ja tha se kjo çështje është rregulluar.
