Në ishullin jugor japonez të Kiyushu, vullkani Nakadake shpërtheu sot në malin Aso, njoftoi Agjencia Meteorologjike Japoneze. Një raport nga media vendase thotë se gjatë shpërthimit që ndodhi në 11.43 të mëngjesit me orën e Tokios, vullkani hodhi hirin në një lartësi prej 3.500 metrash, raportoi Reuters.

Aktualisht nuk ka raporte për viktima ose dëme të mëdha materiale në objektet në këtë vendpushim turistik të njohur, megjithatë, agjencia meteorologjike ka ngritur nivelin e alarmit të shpërthimit vullkanik në nivelin 3 në një shkallë prej 5 dhe këshilloi njerëzit që qëndrojnë në ishull të mos i afrohen malit Aso.

Një paralajmërim u lëshua gjithashtu për shkëmbinj të mëdhenj dhe derdhje piroklastike brenda një rrezeje rreth një kilometër nga Krateri Nakadake.

Hera e fundit që pati një shpërthim të vogël në malin Aso ishte në 2019, dhe në shtator 2014, 63 njerëz vdiqën si rezultat i një shpërthimi vullkanik në malin Ontake, dhe kjo konsiderohet katastrofa më vdekjeprurëse vullkanike në 90 vitet e fundit në Japoni./FrontOnline/