Mbrëmë në Prishtinë një vajzë 9 vjeçare është kafshuar nga qentë endacak. Për këtë rast ka reaguar sot kreu i Komunës, Shpend Ahmeti.

Ahmeti në Facebook ka shkruar se ka më shumë se tre vite që ka dërguar shkresa te institucionet e nivelit qendror për qentë endacak.

“ Në mes tjerash kam kërkuar strategji nacionale për këtë çështje. Komuna e Prishtinës është komuna që ka shpenzuar më së shumti në trajtim, dhe komuna që ka respektuar në përpikmëri Ligjin për Mbrojtjen e Drejtave të Kafshëve. Lehtë është me kalu Ligj në letër evropian e mandej mos me u marr me këtë punë”, ka shkruar ai.

Ahmeti thotë se ka kërkuar nga Këshilli i Sigurisë që kjo temë të trajtohet si çështje sigurie.

“E kam thënë se kur të ndodhin tragjeditë, vajtojmë. Ne po bëjmë strehimore, dhe po trajtojmë qentë e po i kthejmë në rrugë. Edhe po i ushqejmë që mos të jenë agresiv.

Por kjo nuk mund të bëhet vetëm në Prishtinë edhe vetëm nga Prishtina. Kësaj radhe është kafshim e lëndim, po herën tjetër? Mandej kalojmë në esktremin tjetër”, ka thënë ai.