Administrata e Bidenit nuk do të dërgojë një delegacion zyrtar të SHBA-së në Lojërat Olimpike Dimërore 2022 në Pekin. Sekretarja e shtypit e Shtëpisë së Bardhë, Jen Psaki, deklaroi se vendimi vjen si deklaratë kundër “gjenocidit të vazhdueshëm dhe krimeve kundër njerëzimit në Xinjiang” të Kinës.
Psaki u tha gazetarëve në një konferencë se Shtëpia e Bardhë dëshiron të dërgojë një “mesazh të qartë” se abuzimet e të drejtave të njeriut në Kinë nënkuptojnë se nuk mund të ketë “biznes si zakonisht”.
“Përfaqësimi diplomatik ose zyrtar i SHBA-së do t’i trajtojë këto lojëra si biznes përballë abuzimeve skandaloze të të drejtave të njeriut dhe mizorive të PRC në Xinjiang dhe ne thjesht nuk mund ta bëjmë këtë,” tha sekretarja.
Psaki tregoi se bojkoti diplomatik i lojërave nuk do të thotë se “ky është fundi i shqetësimeve që do të ngremë për shkeljet e të drejtave të njeriut”, shkruan CNN, transmeton Klankosova.tv.
Atletët amerikanë do të lejohen ende të konkurrojnë në Lojërat Olimpike, por administrata nuk do të dërgojë zyrtarë qeveritarë në lojëra. Lojtarët që do të përbëjnë skuadrën e SHBA-së kanë “mbështetjen e plotë të administratës”, tha Psaki, por shtoi se administrata nuk do të “kontribuojë në fanfaret (melodi e shkurtër ceremoniale, zakonisht për të prezantuar dikë të rëndësishëm) e lojërave”.
Tutje, ajo shpjegoi gjithashtu se Shtëpia e Bardhë nuk mendonte se ishte hapi i duhur ose i drejtë për të penalizuar atletët amerikanë që stërviteshin prej vitesh, duke mbajtur një bojkot të tërë të Lojërave Olimpike nga SHBA-ja.
Masa shënon një përshkallëzim të presionit të SHBA-së ndaj Kinës mbi akuzat për punë të detyruar dhe abuzime me të drejtat e njeriut në rajonin perëndimor të Kinës, Xinjiang, veçanërisht kundër popullsisë ujgure dhe grupeve të tjera të pakicave etnike dhe fetare.