Kryetari i Odës së Mjekëve të Kosovës, Pleurat Sejdiu në një intervistë për Front Online ka hedhur akuza të rënda ndaj ish-ministrit, Armend Zemaj. E ka quajtur atë gënjeshtar.
“E vërteta qëndron kështu që gjatë muajve, nëntor, dhjetor, janar dhe shkurt, ne kemi qenë në kontakt me Ministrinë e Shëndetësisë dhe kemi shprehur brengën edhe me shkrim ish-ministrit Zemaj për çështjen e mospagesës së shtesave të mbi 400 kolegëve tonë. Ne nuk kemi marrë asnjë përgjigjie. Kanë qenë premtime koti, rrena nga ish-ministri ku na është thënë se këto do të paguhen dhe asnjëherë nuk janë paguar”, ka thënë Sejdiu për Front Online.
Nga këto mjete me vendim të Qeverisë kanë përfituar stafi shëndetësor, por jo të gjithë janë rimbursuar.
Sipas Sejdiut janë mbi 150 mijë euro që MSh ua ka borxh mantelbardhëve.
“Flasim për një shumë mbi 150 mijë euro të cilat Ministria e Shëndetësisë do të duhej t’i paguante”, u shpreh Sejdiu.
Sejdiu e bëri të qartë se padia e ngritur më 3 mars të këtij viti është padi ndaj MSh-së.
Që nga marsi i vitit të kaluar, stafi shëndetësor ka qenë drejtpërdrejt i angazhuar në luftimin e koronavirusit.
18 punonjës shëndetësorë, si pasojë e infektimit me virusin ngjitës, edhe kanë ndërruar jetë.
Lexo edhe:
Përgjysmimi i shtesave nga Qeveria, mjekët e kundërshtojnë vendimin
