Radio stacioni Eho Moskva dhe redaktori i saj u dënuan me para pasi kishin publikuar opinionin e një analisti që dyshonte në statistikat zyrtare të Rusisë rreth koronavirusit. Sipas autoriteteve ruse çdo e dhënë e kundërt rreth koronavirusit konsiderohet i rremë.

Redaktori i radios opozitare ruse Aleksei Venediktov kishte shkruar sot se gjykata e Moskës e dënoi radio stacionin me 2880 dollarë ndërsa redaktorin e ueb faqes së radios Vitalij Ruvinski me 865 dollarë “për publikimin e deklaratës së analistit politik Valeri Solojev” duke shtuar se radio Eho Moskva planifikon të ankohet për vendimin.

Sipas regjistrit të gjykatës, kjo media ruse u dënua për “përhapje të qëllimtë…të dezinformatave” dhe “shkaktim të kërcënimeve për shëndetin dhe jetën e njerëzve”.

Nuk është saktësuar se cila pjesë e deklaratës së Solvejev ishte konsideruar si dezinformatë.

Solvejev kishte deklaruar me 16 mars në intervistën për Eho Moskva se qeveria po gënjen kur thotë se nuk ka vdekur askush në nga koronavirusi, e së paku 1600 njerëz kishte mundësi që kishin vdekur nga mesi i janarit.

Deri atë periudhë zyrtarët rusë nuk kishin njoftuar se kishte viktima nga koronavirusi, e shërbimi shtetëror për vëzhgim të komunikimit, teknologjisë informative dhe mediave, Roskomnadzor kishte kryer presion ndaj radio stacionit ta fshinte intervistën nga ueb faqja e tyre, por redaktorët kishin këmbëngulur në atë se Solovej kishte shprehur mendimin e tij.

Numri i vogël i viktimave si pasojë e infektimit me koronavirus në krahasim me 596000 raste të konfirmuara të infektimit ka ngritur pyetje dhe dyshime si në Rusi dhe Perëndim se ka manipulim me të dhëna për synime politike.

Zyrtarët rus kanë mohuar ashpër këto akuza, duke u thirrur në efikasitetin e masave të vendosura.

Shoqata ruse Agora që ofron ndihmë ligjore në Rusi, ka njoftuar se që nga prilli janë regjistruar rreth 2000 raste të akuzave të përhapjes së dezinformatave rreth pandemisë. Ndjekje penale janë nisur p%r 33 raste, ndërsa janë shqiptuar dënime monetare me rreth 20 mijë dollarë vlerë.

Kjo shoqatë njofton se çdo informacion që dallon nga ai zyrtar konsiderohet i rrejshëm nga pushteti.

Rusia dhe Kina janë akuzuar nga SHBA dhe BE për nisje të fushatës së dezinformacionit ku fajësohet perëndimi për pandeminë për synime të përfitimeve politike dhe shmangie të vëmendjes dhe përgjegjësisë së tyre.