Anëtari i Kryesisë së LDK-së Berat Rukiqi, pas vendimit të qeverisë për rritjen e pagave të punëtorëve në sektorin publik, thotë se partia në të cilën ai është, ka bërë propozimin e saj të koeficientit.

Ai deklaroi se qytetarët “janë të dërmuar dhe pashpresë nga siguria e jetesës”.

“Ne e kemi propozuar koeficientin tonë, ne jemi në opozitë. Ne nuk mund të bëjmë tani rritje tjetër, por normalisht me udhëheqjen e qeverisë, koeficienti 150 është dukshëm më stabil më i qëndrueshëm dhe normalisht edhe me më shumë ndikim te xhepat e secilit shërbyes publik. Kur them me më shumë ndikim pozitiv për shkak se me një anë e adreson rritjen e çmimeve, dhe në anën tjetër e adreson nevojën që ti mbajmë këta shërbyes në Kosovë, që pavarësisht pagës shumica prej tyre thellësisht të dërmuar nga siguria e jetesës në kuptim të asaj se a kanë mjete të mjaftueshme me i paguar faturat e veta”.

Rukiqi gjatë intervistës për Ekonomia Online, tha se qytetarët janë realisht të pashpresë, ngase gjatë katër viteve Qeveria Kurti nuk ka përmbushur asnjë premtim.

Ai premtoi se nëse LDK-ja do të jetë në krye të shtetit, javën e parë të qeverisjes do të sigurojnë qytetarëve paga të dinjitetshme, përcjell Klankosova.tv.

Rukiqi vlerëson se qeveria nuk ka krijuar kushte të shkollimit, trajnimeve, e as vend pune për të rinjtë, sipas tij për këtë arsye ata “rrugë të vetme e shohin migrimin”.

“Raporti i Progresit dje thekson që  33.4 % e të rinjve në moshë pune d.m.th. që janë të moshës së re dhe që janë të aftë për punë as nuk janë në vend pune e as nuk janë duke u shkolluar dhe as nuk janë duke e ndjekur ndonjë trajnim, dhe sipas të njëjtit raport po këta të rinj duke mos pasur as shkollim, as trajnime, as vend pune rrugë të vetme e shohin migrimin”.