Front TV

Rrëfimi i Andin Hotit, i biri që kërkon drejtësi për babain Ukshin Hoti dhe mbi 1600 persona të zhdukur

Rrëfimi i Andin Hotit, i biri që kërkon drejtësi për babain Ukshin Hoti dhe mbi 1600 persona të zhdukur
20:25 | 16 Korrik 2021

Tash e dy dekada nuk dihet gjë për fatin e Ukshin Hotit.

Intelektuali shqiptar është vetëm njëri nga mbi 1600 personat që figurojnë të zhdukur në Kosovë gjatë luftës së fundit.

Për zbardhjen e fatit të tij dhe të tjerëve do të angazhohet i biri, Andini.

Për këtë, atij, së fundmi Qeveria “Kurti” ia ka besuar dy pozita.

Ai është emëruar kryetar i delegacionit të Kosovës për bisedime në çështjen e personave të zhdukur dhe kryesues i Komisionit Qeveritar për Personat e Zhdukur.

“Ne kemi vetëm një parim – mision, zbardhjen e fatit të personave të zhdukur, dmth deri në personin e fundit të zhdukur gjatë luftës së fundit, gjatë gjenocidit që ka ndodhë 1998-99″, theksoi Hoti për “Front Online”.

Që kjo të ndodh Hoti do të kërkojë nga zyrtarët e palës serbe, kurdo që të takohet me ta, hapjen e arkivave të tyre.

“Adresa e vetme është Serbia. Do të kërkojmë që ata t`i hapin arkivat e Serbisë, më në fund, dhe të na tregojnë se çfarë ka ndodhur me personat e zhdukur me dhunë gjate luftës së fundit”, u shpreh Hoti për “Front Online”.

Çështja e të pagjeturve do të jetë temë diskutimi edhe në takimin që kryeministri kosovar Albin Kurti dhe presidenti i Serbisë, Aleksandër Vuçiq, do të mbajnë të hënën, më 19 korrik, në Bruksel.

Në atë të parin kreu kosovar i kërkoi atij serb shkarkimin e Veljko Odaloviq, kreut të Komisionit të Serbisë për Personat e Zhdukur me arsyetimin se ai mori pjesë në Kosovë gjatë luftës së fundit, 1998-99.

Pavarësisht kësaj, Hoti, thotë se do ta takojë homologun e tij serb.

“Interesi im kryesor, primar dhe i vetëm është zbardhja e fatit të personave të zhdukur dhe për këtë do ta takoj secilin person, individ, apo grup që mund të ndihmojë në këtë drejtim”, potencoi Hoti për “Front Online”.

Pas përfundimit të luftës në Kosovë në vitin 1999 rezultuan 6 mijë e 500 persona të zhdukur.

Shumica prej tyre u gjetën, si rezultat i zhvarrimeve në varreza masive në Kosovë dhe Serbi.

Natën e Kurban Bajramit Petrol Company shpërndan 40 pako ushqimore për fëmijët jetim në Kosovë

Të tjera