Bota/Rajoni

Rekord i ri në rastet ditore me COVID-19 në botë

Rekord i ri në rastet ditore me COVID-19 në botë
10:20 | 06 Korrik 2020

Në botë u shënua një rritje rekord në numrin e rasteve me koronavirus, më se 212.300 brenda 24 orëve, njoftoi Organizata Botërore e Shëndetësisë.

Shtetet e Bashkuara, Brazili dhe India ishin vendet me rritjen më të madhe, thuhet në raportin e përditshëm të organizatës.

Rekordi i mëparshëm i raportuar ishte 189.000 më 28 qershor. Vdekjet vazhdojnë të jenë rreth 5.000 në ditë. Në të gjithë botën tani ka afro 11 milionë raste të konfirmuara, sipas organizatës.

Në SHBA qendrat për kontrollin dhe parandalimin e sëmundjeve raportuan të shtunën një rritje prej 52.490 rastesh, duke e çuar në rreth 2.8 milionë numrin e përgjithshëm.

Vdekjet u rritën me gati 750, duke arritur në gjithsej 129.400. SHBA-ja vendosi të enjten një rekord të ri me më shumë se 55.000 infektime ditore.

Të shtunën shteti i Floridës raportoi një numër rekord të rasteve të reja të konfirmuara, rreth 11.500.

Edhe Teksasi raportoi rritjen më të madhe ditore me më shumë se 8.200 dhe numri i të shtruarve në spitale shënoi një rekord të ri.

Që nga e premtja i gjithë shteti i Teksasit është nën urdhrat e guvernatorit që njerëzit të mbajnë maska në publik, përndryshe mund të dënohen me 250 dollarë gjobë. /VOA

Prince Espresso miku më i mirë i yjeve të Sunny Hill Festival

Të tjera