Kandidati i Partisë Demokratike të Kosovës për kryetar të Drenasit, Ramiz Lladrovci është i bindur që do të qeverisë me këtë komunë edhe për katër vite të tjera, pavarësisht që qytetarët e kësaj komune nuk ia dhanë besimin me herën e parë.

Lladrovci në balotazh, do të pwrballet me kandidatin e Demokratëve për Drenasin, Driton Ajazi, shkruan FrontOnline.

Lladrovci ka fituar besimin e 45.62% të qytetarëve derisa Ajazi ka fituar e 30.74%.

Lidhur me koalicionet e mundshme para 14 nëntorit me subjektet tjera politike për FrontOnline, ka folur Ramiz Lladrovci.

Ai ka thënë se nuk ka filluar bisedat me asnjë parti pasi koalicion bën vetëm me qytetarët e kësaj komune.

“Jo, nuk kam filluar bisedat me krerët e subjekteve tjera politike, sepse, koalicion bëj vetëm me qytetarët e komunës së Drenasit, me qytetarët kampion të komunës më të mirë me qeverisje lokale, qytetarin e Drenasit që më ndihmoi të jem kampion i qeverisjes së mirë, që më ofroi bashkëpunim e përkrahje pa dallim”, ka thënë ai për FrontOnline.

Lladrovci beson se vota e qytetarëve të Drenasit do të jetë pro kandidaturës së tij.

“Besoj fort se vota do të jetë plebishitare, pro kandidaturës time, pro qeverisjes së mirë lokale, pro zbatimit të ligjit, pro barazisë para ligjit, pro transparencës dhe llogaridhënies. Të gjitha këto i kemi dëshmuar, andaj, pres nga qytetarët që së bashku edhe një mandat të vazhdojmë me suksese”, ka shtuar ai.

Në Kosovë në zgjedhjet e 17 tetorit kanë shkuar në balotazh 21 komuna./FrontOnline/