Kryeministri Edi Rama, gjatë prezantimit të kandidatëve për Tiranën, shprehu krenarinë për ekipin e Partisë Socialiste, duke theksuar se kjo skuadër ofron mundësi të plota për të gjitha moshat, gratë, vajzat dhe të rinjtë. Ai theksoi se PS ofron për qytetarët një mundësi të zgjedhjes, duke siguruar se çdo grup shoqëror do të ketë përfaqësues të denjë në Kuvendin e Shqipërisë.

“Jam shumë krenar për këtë skuadër sepse besoj që me këtë skuadër ne i kemi dhënë të gjithë qarkut të Tiranës një ofertë të plotë. Të gjitha moshave një mundësi zgjedhjeje të plotë, i kemi dhënë vajzave dhe grave një buqetë ku mund të zgjedhin padyshim përfaqësuesen e tyre në Kuvendin e Shqipërisë,” – tha Rama.

Ai shtoi: “Ne ofrojmë një skuadër të rinjsh dhe profesionistësh, me një përzierje të rinisë dhe eksperiencës. PS është e vetmja parti që ka mundësinë të udhëheqë Tiranën përmes të resë dhe eksperiencës.”

Ai gjithashtu krahasoi PS me partitë e tjera, duke i quajtur ato “të kalbura” dhe tha se “Hedhja e votës kudo tjetër përveçse te kutia e PS-së, është ta çosh votën kot.”

Në përfundim, Rama theksoi rëndësinë e zgjedhjeve, duke nënvizuar se ato lidhen drejtpërdrejt me “fatin evropian të Shqipërisë.”